İyunun 5-də Milli Məclisin Səhiyyə komitəsinin  növbəti iclası keçirildi.
İclası açan komitə sədri Əhliman Əmiraslanov  əvvəlcə   müzakirəyə  təqdim  edilən “İnsan orqan və ya toxumalarının  transplantasiyası haqqında” qanunda  dəyişikliklər  edilməsi  barədə danışdı. Komitə  sədri  qeyd etdi ki, hazırda bütün  dünyada  insan orqan və toxumalarının transplantasiyası geniş yayılıb. Dünyada ildə təxminən, 300 min orqan və ya toxuma transplantasiyası həyata keçirilir. Qeyd  olundu ki, Azərbaycanda orqan transplantasiyası sahəsindəki problemlər qanunda mövcud olan müəyyən boşluqların  aradan  qaldırılmasını zəruri edib.
Komitə sədrinin müavini Musa Quliyev sənədə edilən  dəyişiklikləri ətraflı şərh etdi. Bildirildi ki, sənədin adı dəyişdirilərək “İnsan orqan və (və ya) toxumalarının donorluğu və transplantasiyası haqqında” qanun adlandırılıb. Sənəd insan orqan və toxumalarının donorluğu və onların transplantasiyası ilə bağlı münasibətləri tənzimləyəcək, donorların, resipientlərin, orqan transplantasiyası sahəsində fəaliyyət göstərən tibb işçilərinin və tibb müəssisələrinin hüquq və vəzifələrini müəyyən edəcək. Qanuna əlavə edilən 11.1 (Ölü donorun və hissələrinin xaricdən gətirilməsi və göndərilməsi) maddəsinə əsasən, ölü donorun və hissələrinin transplantasiyası, tədris və elmi məqsədlərlə xarici ölkələrdən gətirilməsi və ya xaricə göndərilməsi müvafiq icra hakimiyyəti orqanı tərəfindən müəyyən edilmiş qaydalarla həyata keçiriləcək.
 Millət  vəkilləri Rafiq  Məmmədhəsənov, Məlahət  İbrahimqızı, Rəşad Mahmudov, Qənirə Paşayeva,  Kamilə Əliyeva, İlham Məmmədov, Sədaqət Vəliyeva, dəvət  olunmuş mütəxəssislər, tanınmış cərrahlar, transplantoloqlar,  həkim-hematoloqlar sənədlə  bağlı  fikirlərini  bildirdilər,  təkliflər  səsləndirildi.
Komitə  üzvləri  layihənin yenidən işlənməsi üçün işçi qrupuna qaytarılmasını qərara aldılar.
Sonra tibbi optika üzrə qanunvericiliyin təkmilləşdirilməsi  baxımından “Tibbi optika haqqında” qanun layihəsinin hazırlanması  ilə bağlı  dinləmələr  keçirildi. Əhliman Əmiraslanov bildirdi ki, sənəd Azərbaycanda optika mağazalarının fəaliyyəti ilə bağlı tələbləri müəyyənləşdirəcək.
Onun sözlərinə görə, əhaliyə optikaçılıq xidmətləri yalnız optika mağazaları vasitəsilə göstərilməlidir. Bu mağazaların açılması müvafiq icra hakimiyyəti orqanının rəyi əsasında həyata keçiriləcək. 10 maddən ibarət qanun layihəsində bildirilir ki, optika mağazasında tibbi optika məhsulları ilə yanaşı, qoruyucu və gün eynəklərinin, eynək sağanaqlarının, digər əlaqəli məmulatların, ehtiyat hissələrinin və aksessuarlarının satışı, hazırlanması, quraşdırılması, montajı, sazlanması, uyğunlaşdırılması, təmiri, servis-texniki xidməti həyata keçirilə bilər. Optika mağazasının müdiri optikaçı və ya optometrist olmaya da bilər. Məhsulların satışı pasiyentin sifarişi və ya təqdim olunan həkim resepti əsasında həyata keçirilir. Pasiyentin sifarişi əsasında satılan tibb optika məhsulunun ölçüsünün pasiyentin görmə dərəcəsinə uyğun olmamasına görə optika mağazası məsuliyyət daşımır. Optika mağazasında optometrist fəaliyyət göstərmirsə, orada müayinə üçün istifadə olunan tibbi optika avadanlığı saxlanıla bilməz.
Ətraflı müzakirələrdən sonra layihənin Milli Məclisin  payız sessiyası dövründə təkrarən komitədə müzakirəyə çıxarılması məqsəduyğun sayıldı. 

  Milli Məclisin
Mətbuat  xidməti