Oktyabrın 5-də  Milli Məclisin növbəti plenar iclası  keçirildi. İclası  açan  Milli Məclisin  Sədri Oqtay Əsədov gündəliyi təqdim etdi.
Əvvəlcə Vergi Məcəlləsində dəyişikliklər edilməsi barədə qanun layihəsi birinci oxunuşda müzakirə olundu. Sənədlə bağlı məlumat verən İqtisadi siyasət, sənaye və sahibkarlıq komitəsinin sədri Ziyad  Səmədzadə  bildirdi ki, dəyişikliyə əsasən sənədin 44.5-ci maddəsi yeni redaksiyada verilir. Həmin maddədə deyilir: “Ekspert qarşısında qoyulan suallar onun xüsusi biliyindən kənara çıxdıqda, yaxud təqdim olunan materiallar və sənədlər rəy verilməsi üçün yararsız olduqda və ya kifayət qədər olmadıqda, ekspert rəy verməkdən imtina edir”. Qeyd  olundu ki,  Vergi Məcəlləsində dəyişiklik edilməsi haqqında sənəd “Dövlət məhkəmə ekspertizası fəaliyyəti haqqında” qanunda dəyişiklik edilməsi barədə qanunun icrası məqsədilə hazırlanıb. Sənəd  səsə  qoyularaq  birinci oxunuşda təsdiqləndi.
Ziyad  Səmədzadə  Gömrük Məcəlləsində dəyişikliklər edilməsi barədə qanun layihəsini də birinci oxunuşda təqdim etdi. Bildirildi ki, Məcəllənin 323.1.5-ci və 323.1.6-cı maddələri ləğv olunur. Vergi Məcəlləsində olduğu kimi, bu  sənədə də ekspert  rəyinin alınması ilə bağlı yeni maddə  əlavə  edilir. Bu sənədin də “Dövlət məhkəmə ekspertizası fəaliyyəti haqqında” qanuna uyğunlaşdırma  məqsədi ilə hazırlandığı vurğulandı. Sənəd  səsvermə  yolu ilə ilk oxunuşda təsdiq  edildi.
Ziyad Səmədzadə gündəlikdəki  digər  iki məsələ  -  Mülki Məcəllədə  və “Banklar  haqqında”  qanunda  dəyişikliklər edilməsi  ilə bağlı  sənədləri  birinci oxunuşda  birlikdə  şərh etdi.  Qeyd  edildi ki, nəzərdə tutulan dəyişikliklərə əsasən Mülki Məcəllənin 49-1-ci maddəsinə “qanunla müəyyən edilmiş digər şəxslər” məzmunlu yeni bənd əlavə olunacaq. Eyni zamanda, 55-ci maddəyə “Bankların yenidən təşkili “Banklar haqqında” qanuna uyğun həyata keçirilir” məzmunlu 55.6-cı bənd daxil ediləcək.
Qanun layihələrinə görə yerli bankların, onların filial, şöbə və nümayəndəliklərinin, habelə xarici bankların yerli filial və nümayəndəliklərinin ləğvi “Banklar haqqında” qanunun tələbləri nəzərə alınmaqla həyata keçiriləcək. Eyni zamanda, hüquqi şəxsin məhkəmə tərəfindən müflis sayılması əsasları və qaydaları qanunla müəyyənləşdiriləcək. Səhmdar cəmiyyətin təsisi zamanı səhmlərin buraxılışı və dövlət qeydiyyatı bu sənədlərlə müəyyən edilmiş qaydada həyata keçiriləcək. Mülki Məcəllədə, həmçinin bir sıra texniki dəyişikliklərin edilməsinin nəzərdə tutulduğu da qeyd  olundu. 
Bildirldi ki, “Banklar haqqında” Qanunda edilməsi nəzərdə tutulan dəyişikliklərə əsasən bank ən azı üç hüquqi və ya fiziki şəxs tərəfindən açıq səhmdar cəmiyyəti formasında yaradılır və fəaliyyət göstərir. Bundan əlavə, cəmiyyətin icra orqanının səlahiyyətləri müqaviləyə əsasən başqa hüquqi şəxsə və ya fərdi sahibkara (idarəçiyə) verilə bilməz. Sənədə, həmçinin “bankın Audit Komitəsinin üzvlərini təyin və azad etmək, Audit Komitəsinin əsasnaməsini təsdiq etmək” məzmunlu maddə əlavə edilir. Dəyişikliyə əsasən bankın digər idarəetmə orqanlarının üzvü olan şəxslər bankın Audit Komitəsinin üzvü ola bilməz. Qanuna bir sıra texniki dəyişikliklərin edilməsi  də  nəzərdə  tutuldu. Hər  iki sənəd  ayrı-ayrılıqda  səsə  qoyularaq  birinci oxunuşda təsdiq  edildi. 
Sonra Hüquq  siyasəti və dövlət  quruculuğu  komitəsinin sədri  Əli Hüseynli Mülki Məcəllədə dəyişiklik edilməsi barədə digər qanun layihəsini  birinci oxunuşda təqdim etdi. Bildirildi ki, Məcəlləyə “Azərbaycan Respublikasında ipoteka kreditləşməsinin bəzi məsələləri haqqında” Azərbaycan Prezidentinin 2016-cı il 22 iyun tarixli Fərmanının 9.2-ci bəndinin icrası, habelə bu sahədə məmur-vətəndaş təmasının minimum səviyyəyə çatdırılması, şəffaflığın artırılması, sağlam və təhlükəsiz elektron informasiya mübadiləsinin təmin edilməsi məqsədilə bir sıra dəyişikliklər edilir. Dəyişikliklər daşınmaz əmlak üzərində ipoteka hüququnu təsbit edən ipoteka kağızının qeydiyyatının və dövriyyəsinin elektron qaydada təşkili ilə bağlı müddəaların hüquqi əsasının formalaşdırılmasını, həmçinin ipoteka kağızının tərtib olunması, ipoteka qoyan tərəfindən imzalanmasını, onun notariat qaydasında təsdiqlənməsini və digər prosedurların elektron qaydada həyata keçirilməsini əks  etdirir.  Sənəd səsə  qoyularaq ilk oxunuş üçün qəbul  edildi.
Sonra iclasda “İpoteka haqqında” qanunda dəyişiklik edilməsi barədə qanun layihəsinə birinci oxunuşda baxıldı.  Bildirildi ki, dəyişikliyə əsasən daşınmaz əmlak üzərində ipoteka hüququnu təsbit edən ipoteka kağızı “sənədsiz adlı qiymətli kağız” formasında rəsmiləşdirilir. Daşınmaz əmlak üzərində ipoteka hüququnu təsbit edən ipoteka kağızının mülkiyyətçisi - ipoteka kağızının elektron sistemində mülkiyyət hüququnu rəsmiləşdirilmiş şəxsdir. Sənəd  səsvermə  yolu ilə birinci oxunuşda təsdiqləndi.
Ziyad  Səmədzadə birinci oxunuşda müzakirə edilən “Lotereyalar haqqında” qanunda dəyişiklik edilməsi barədə sənədi  şərh  edərkən bildirdi ki, qanun layihəsi elektron lotereyaların  təşkili və keçirilməsinə nəzarət mexanizmlərinin təkmilləşdirilməsini nəzərdə tutur.  Bu lotereyaların “Fərdi məlumatlar haqqında” qanuna əsasən dövlət qeydiyyatına alınmış elektron informasiya sistemi vasitəsilə həyata keçirilməsini məqsədəuyğun sayır. Dəyişikliklərə görə stimullaşdırıcı lotereyada iştirak etmək üçün lotoreya obyektinin qiymətindən əlavə haqqın alınmasına yol verilmir. Stimullaşdırıcı lotereyalar yalnız tirajlı formada keçirilir.  Bu  qanun layihəsi  də  millət  vəkilləri  tərəfindən ilk oxunuş üçün  razılıqla  qarşılandı.
Əli Hüseynli birinci oxunuşda nəzərdən keçirilən Cinayət Məcəlləsində təklif olunan dəyişiklikləri təqdim etdi. Qeyd  olundu ki,  dəyişikliklər yerin təkinin qorunması və istifadə edilməsi qaydalarının pozulması hallarına  görə  cinayət  məsuliyyətinin  sərtləşdirilməsi  məqsədi ilə təklif edilir. Yerin təkindən istifadə  qaydalarının pozulmasının ağir  nəticələrə və insan ölümünə  səbəb olmasının  yeni cinayət  tərkibləri  kimi müəyyən edilməsi, əhəmiyyətli zərər vurma ilə bağlı mövcud  cinayət  tərkibinin  sanksiyasına  azadlıqdan məhrum etmə cəzasının əlavə edilməsi və cərimənin minimum və maksimum  məbləğinin artırılması  nəzərdə  tutulur.  Bildirildi ki, ərazidə qanunsuz tikinti aparılması əhəmiyyətli zərərə səbəb olduqda altı min manatdan on min manatadək miqdarda cərimə və ya üç ilədək müddətə müəyyən vəzifə tutma,  müəyyən fəaliyyətlə məşğul olma hüququndan məhrum etmə,  bir ilədək müddətə islah işləri və ya bir ilədək müddətə azadlığın məhdudlaşdırlması ilə cəzalandırılır. Sənəd  səsə  qoyularaq birinci oxunuşda təsdiq  edildi.
Sonra iclasda İnzibati Xətalar və Cinayət məcəllələrində, “İnzibati icraat haqqında”, “Hüquqi şəxslərin dövlət qeydiyyatı və dövlət reyesti haqqında” qanunlarda dəyişiklik edilməsi barədə qanun layihələrinə uyğunlaşdırma  məqsədi ilə edilən  dəyişikliklər birinci oxunuşda nəzərdən keçirildi.  Qanun layihələri ayrı-ayrılıqda  səsə  qoyularaq  ilk oxunuş üçün təsdiqləndi.
İclasda  “Azərbaycan Respublikası vətəndaşının şəxsiyyət vəsiqəsi haqqında” Qanunda nəzərdə tutulan dəyişikliklər birinci oxunuşda müzakirə edildi. Bununla  əlaqədar məlumatı  diqqətə çatdıran Əli Hüseynli  bildirdi ki, qanun layihəsinə əsasən “Şəxsiyyət vəsiqəsində göstərilən məlumatlar” adlı 3-cü maddəyə “əl-barmaq izləri” sözləri əlavə ediləcək. Bu  qanun layihəsi  də səsvermə yolu ilə birinci oxunuşda məqsəduyğun hesab  edildi.
Birinci oxunuşda nəzərdən keçirilən “Pasportlar haqqında” qanunda edilən dəyişikliklərə görə diplomatik pasportlar Azərbaycanın xarici ölkələrdə fəaliyyət göstərən diplomatik nümayəndəlikləri nəzdində təsis edilən hərbi attaşelik aparatlarının zabit heyətinə, həmçinin beynəlxalq təşkilatlardakı hərbi nümayəndələrinə və onların müavinlərinə, eyni zamanda, müvafiq icra hakimiyyəti orqanının xarici dövlətlərdə və beynəlxalq təşilatlarda nümayəndələrinə də veriləcək. Sənəd  səsə  qoyularaq  birinci oxunuşda qəbul  edildi.
Cinayət  Məcəlləsinə  edilən  dəyişiklikləri  birinci oxunuşda şərh edən Əli Hüseynli bildirdi ki, sənəd qanunvericiliyə uyğunlaşdırma  məqsədi ilə hazırlanıb. Cinayət  Məcəlləsinin 213-cü  maddəsinin adında  dəyişiklik  edilərək “vergi ödəməkdən yayınma”  sözləri “Vergiləri  işsizlikdən sığorta və ya  məcburi dövlət  sosial sığorta  haqlarını ödəməkdən yayınma”sözləri ilə əvz  edilir. Sənəd  səsə  qoyularaq ilk oxunuşda  qəbul  edildi.
Sonra  İnzibati Xətalar Məcəlləsində dəyişiklik edilməsi barədə qanun layihəsinə birinci oxunuşda baxıldı. Bildirildi ki, sənədə “Qəbiristanlıqların idarə olunması qaydaları haqqında qanunvericiliyin pozulması” məzmunlu yeni 516-1-ci maddə əlavə olunub. Bu maddəyə əsasən, dəfn barədə məlumatın dəfnlərin vahid reyestrində vaxtında yerləşdirilməməsinə görə vəzifəli şəxslər 100 manatdan 300 manatadək məbləğdə cərimə edilirlər. Qəbiristanlıqların qorunması tələblərinin, habelə dəfnlərin təşkili zamanı sanitariya-gigiyena normalarının pozulmasına görə fiziki şəxslər 20 manatdan 50 manatadək məbləğdə, vəzifəli şəxslər 500 manatdan 1000 manatadək məbləğdə cərimə olunacaqlar. Bildirldi ki, qəbir yerlərinin rezervasiyası tələblərinin pozulması, dəfnə icazə verilməyən ərazilərdə dəfnlərin həyata keçirilməsinə görə 500 manatdan 1000 manatadək məbləğdə cərimələr tətbiq ediləcək. Bu  sənəd  də birinci oxunuşda qəbul olundu.
İclasda birinci oxunuşda “Bələdiyyələrin statusu haqqında” qanunda dəyişikliklər edilməsi barədə qanun layihəsi müzakirə edildi. Sənədi şərh edən Regional məsələlər komitəsinin  sədri Arif  Rəhimzadə qeyd  etdi ki, qəbiristanlıqların salınması və idarə olunması məsələlərində bələdiyyələrin üzərinə düşən vəzifələrin müvafiq icra hakimiyyəti orqanı tərəfindən müəyyən edilmiş qaydalara uyğun olaraq həyata keçirilmədiyi hallarda məsuliyyət məsələsini təmin etmək məqsədilə sənədin 4-cü maddəsinə bəzi dəyişikliklər edilməsi təklif olunur.  Birinci oxunuşda nəzərdən keçirilən “Bələdiyyələrin maliyyəsinin əsasları haqqında”  qanunda edilən dəyişikliklərin də  bu  sənədə  uyğunlaşdırma  məqsədi ilə aparıldığı bildirldi. Hər  iki sənəd  ayrı-ayrılıqda  səsə  qoyularaq ilk oxunuş üçün  təsdiq  edildi.
Bununla  da  Milli Məclisin bugünkü  iclası öz işini başa çatdırdı. 

Milli Məclisin
Mətbuat  xidməti