Dekabrın 7-də  Milli Məclisin növbəti iclası  keçirildi. İclası açan Milli Məclisin Sədri Oqtay Əsədov gündəliyin  təsdiqindən  sonra  millət  vəkillərini Azərbaycan Xalq  Cümhuriyyəti parlamentinin ilk iclasının 100 illiyi  münasibətilə  təbrik etdi.
Cari  müzakirələr  zamanı deputatlardan Əli Hüseynli, Bəxtiyar Əliyev,  Fazil Mustafa, Zahid Oruc,  Fərəc Quliyev, Aqil Abbas, Sahib Alıyev,  Musa Qasımlı,  Siyavuş Novruzov,  İsa Həbibbəyli, Cavid Qurbanov,  Araz Əlizadə ölkə  gündəmində olan vacib məsələlərdən söz  açdılar. 
Sonra  gündəlikdəki məsələlərin müzakirəsinə  başlanıldı.
İlk olaraq Milli Məclis Sədrinin müavini, Təbii ehtiyatlar, energetika və ekologiya komitəsinin sədri Valeh Ələsgərov “Normativ hüquqi aktlar haqqında” Konstitusiya Qanununda dəyişiklik edilməsi barədə sənədi ikinci səsverməyə  təqdim etdi. Bildirildi ki, qanuna  aşağıdakı redaksiyada  yeni 5.4-cü maddə əlavə  edilir: “Ələt azad iqtisadi  zonası haqqında” qanunla  müəyyən  edilmiş  hallarda  zona  ərazisində  bu  Konstitusiya  qanunundan  fərqli  hüquqi  tənzimləmə  tətbiq  edilir və həmin zonanın  fəaliyyəti ilə bağlı  qəbul edilmiş  aktlar  azad  zona  daxilində  məcburi  hüquqi  qüvvəyə malikdir.”  Sənəd  səsvermə  yolu ilə təsdiqləndi.
İqtisadi siyasət, sənaye və sahibkarlıq komitəsinin sədri Ziyad Səmədzadə parlamentdə üçüncü oxunuşda müzakirəyə çıxarılmış “Aviasiya haqqında”, “Dövlət borcu haqqında” qanunlarda ikinci  oxunuşdan  sonra  heç bir  dəyişikliyin olmadığını bildirdi. Qanun  layihələri  səsə  qoyularaq   təsdiqləndi.
Hüquq  siyasəti və  dövlət  quruculuğu  komitəsinin sədri  Əli Hüseynli Cinayət Prosessual, İnzibati Xətalar Məcəllələrinə və “İnzibati icraat haqqında”  qanun  layihəsinə  təklif  olunan  dəyişikliklərə dair məsələləri şərh etdi. Qanun layihələri ayrı-ayrılıqda səsə qoyularaq üçüncü oxunuşda qəbul edildi.
Sonra Səhiyyə komitəsinin sədri Əhliman Əmiraslanov “Psixoloji yardım haqqında” qanun layihəsini üçüncü oxunuşda  təqdim etdi. Bildirildi ki, sənədə parlamentin plenar iclasında birinci  və ikinci oxunuşlarda baxılıb və təqdim olunan bir  sıra  təkliflər nəzərə alınıb. Sənəd Azərbaycanda psixoloji yardım göstərilməsinin hüquqi əsaslarını, psixoloji yardım alan şəxslərin və psixoloqların hüquq və vəzifələrini müəyyən edir, bu sahədə yaranan münasibətləri tənzimləyir. Azərbaycanda daimi yaşayan vətəndaşlığı olmayan şəxslər psixoloji yardım sahəsində ölkə vətəndaşları ilə bərabər hüquqlara malikdirlər. Qanunda psixoloji profilaktika və maarifləndirmə, psixoloji məsləhət, psixoloji dəstək, psixoloji diaqnostika, psixoterapiya, psixoloji reabilitasiya və psixoloji korreksiya, psixoloji ekspertiza, psixoloji treninq psixoloji yardımın növləri olaraq təsbit olunur. Dövlət vətəndaşların vaxtında, keyfiyyətli psixoloji yardım almaq hüququna təminat verir. Sənəd  səsə  qoyularaq təsdiqləndi.
Sonra Əli Hüseynli “Dövlət qulluğu haqqında” qanuna təklif  olunan  termin dəyişikliyini  şərh etdi. Qeyd  olundu ki,  Azərbaycan Prezidentinin  2003-cü il  4  avqust  tarixli  fərmanı ilə  təsdiq  edilmiş “İnzibati və yardımçı vəzifələrin təsnifat toplusu”nun  bir maddəsi ilə  ölkə başçısının  digər  bir  fərmanı ilə  təsdiq  edilmiş “Yerli icra  hakimiyyətləri haqında Əsanamə”nin arasında  mövcud  olan uyğunsuzluğu  aradan  qaldırmaq  məqsədi  ilə  bu  dəyişiklik  təklif  edilib.  Göstərilən hər iki  normativ  hüquqi  aktda  sahə inzibati ərazi  dairəsi dövlət orqanı kimi, sahə inzibati  ərazi  nümayəndəsinin vəzifəsi isə  inzibati  vəzifə kimi  təsbit  edilmişdir. Sənəd  səsvermə  yolu ilə qəbul  edildi. 
Ailə, qadın və uşaq məsələləri komitəsinin sədri Aqiyə Naxçıvanlı “Uşaq hüquqları haqqında” və “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında” qanunlarda dəyişiklik edilməsi barədə sənədi  təqdim etdi.  Bildirildi ki, hər  iki sənədə  təklif  olunan  dəyişikliklər “Məktəbəqədər  təhsil haqqında”  14  aprel  2017-ci il  tarixli  qanuna  uyğunlaşdırma  məqsədi  daşıyır.  Bu sənədlər  də  millət  vəkilləri  tərəfindən müsbət  dəyərləndirildi.
İqtisadi  siyasət, sənaye və sahibkarlıq komitəsinin sədri Ziyad  Səmədzadə və Aqrar  siyasət  komitəsinin   sədri  Eldar İbrahimov “Sahibkarlıq fəaliyyəti haqqında” və “Çayçılıq haqqında” qanunlarda dəyişiklik edilməsi barədə məlumatda  bildirdilər ki, “Azərbaycan Respublikasında sahibkarlığın inkişafına dövlət dəstəyi mexanizminin təkmilləşdirilməsi haqqında” ölkə Prezidentinin 2018-ci il 31 iyul tarixli Fərmanı ilə Sahibkarlığa Kömək Milli Fondu ləğv edilmiş və İqtisadiyyat Nazirliyinin tabeliyində Sahibkarlığın İnkişafı Fondu publik hüquqi şəxs təsis edilmişdir. Həmin fərmanla Sahibkarlığın İnkişafı Fondunun Nizamnaməsi və Fondun vəsaitindən istifadə qaydası təsdiq edilmişdir. Qeyd edildi ki, hər iki qanun layihəsində edilən dəyişikliklər adıçəkilən fərmana uyğun olaraq publik hüquqi şəxs statusunda olan İqtisadiyyat Nazirliyinin tabeliyində Sahibkarlığın İnkişafı Fondunun yaradılması ilə bağlıdır və sənədlərdə “Sahibkarlığa Kömək Milli Fondu” sözləri “müvafiq icra hakimiyyəti orqanının müəyyən etdiyi orqanının” sözləri ilə əvəz edilir. Sənədlər  səsə  qoyularaq  qəbul  edildi.
Ziyad Səmədzadə “Avtomobil yolları haqqında” qanunda dəyişiklik edilməsi barədə məlumatında  vurğuladı ki, “Azərbaycan  Avtomobil Yolları  Dövlət  Agentliyini yaradılması  haqqında” ölkə Prezidentinin 18 oktyabr  2017-ci il  tarixli fərmanı var. Bu fərmanla ölkənin avtomobil  yolları  sahəsində  idarəetməni və nəzarət  mexanimlərini daha da  təkmilləşdirmək, işin səmərəliliyini  artırmaq  məqsədi ilə  “Azəravtoyol” ASC  “Azərbaycan  Avtomobil Yolları  Dövlət  Agentliyi” publik hüquqi şəxsə  çevrilmişdir. Agentliyin  müvafiq  icra  hakimiyyəti orqanı olmaması  qeyd  olunan  dəyişikliklərin edilməsi  zərurətini yaradır. Agentlik öz fəaliyyət  istiqamətlərini müvafiq  lisenziya olmadan  həyata  keçirə biləcəkdir.  Bu işlərin siyahısı  isə müvafiq  icra  hakimiyyəti  tərəfindən  təsdiq  ediləcəkdir.  Komitə  sədri  qanuna  bir  sıra  dəqiqləşdirmə  xarakterli  dəyişikliklər  edildiyini, o cümlədən ödənişli  yollarla  bağlı  maddənin də əlavə olunduğunu  vurğuladı. Millət vəkilləri sənəddə  edilən dəyişiklikləri razılıqla qarşıladılar.
İclasda “Azərbaycan Sərhəd Mühafizəsinin 100 illiyi (1919-2019)” yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə  sənəd   də ikinci  oxunuşda  səsə  qoyularaq  qəbul  edildi.
Sonra Əli Hüseynli “Hüquqi şəxslərin dövlət qeydiyyatı və dövlət reyestri haqqında” qanunda dəyişiklik edilməsi barədə sənədi ikinci oxunuşda  təqdim edərkən bildirdi ki,  təklif  edilən  dəyişikliyin məqsədi  məhdud  məsuliyyətli  cəmiyyətin  təsis  sənədlərində  edilmiş  dəyişikliklərin və  qeydə  alınmış  faktların  elektron qaydada  qeydiyyata  alınmasının hüquqi  mexanizminin müəyyən  edilməsindən ibarətdir. Sənəd səsə  qoyularaq  təsdiq  edildi.
  Əli  Hüseynli Mənzil və İnzibati Xətalar Məcəllələrində dəyişiklik edilməsi haqqında sənədləri də ikinci oxunuşda şərh etdi.  O, vurğuladı ki,  hər  iki  sənəddə  edilən  dəyişiklik  qanunvericiliyin  təkmilləşdirilməsi,  terminlərin dəqiqləşdirilməsi ilə bağlıdır. Sənədlər çoxmənzilli  binaların, tikintisi  və ya yenidən  qurulması tam başa  çatmış  kooperativ binanın idarə olunması  ilə bağlı  mexanizmləri  təkmilləşdirmək  məqsədi ilə hazırlanmışdır.  Mənzil  qanunvericiliyinin pozulmasına  görə  cərimə  sanksiyalarının tətbiq olunması  üsulları  da  sənəddə  əksini tapır. Hər  iki  sənəd  ayrı-ayrılıqda  səsə  qoyularaq  təsdiqləndi.
Əli Hüseynli “Hüquqi şəxslərin dövlət qeydiyyatı və dövlət reyestri haqqında” qanunda dəyişiklik edilməsi barədə qanun layihəsini ikinci oxunuşda təqdim etdi. Deputatlar qanunvericiliyin uyğunlaşdırılması məqsədilə sənədin 12 və 14-cü maddəsinə təklif olunan. dəyişikliyə də razılıq verdilər. Sənəd ikinci oxunuşda qəbul edildi.
Əli Hüseynli Seçki Məcəlləsində dəyişiklik edilməsi haqqında sənədlə  bağlı  məlumatında  bildirdi ki, 2016-cı ilin sentyabrında ölkəmizdə keçirilmiş referenduma əsasən Konstitusiyada bir sıra dəyişikliklər edilməsi nəticəsində Seçki Məcəlləsində mövcud olan 178.1-ci maddə ilə ziddiyyət meydana gəlib. Belə ki, növbədənkənar  Prezident  seçkilərində  seçilmiş Prezidentin səlahiyyət  müddəti  oktyabr  ayında  yox, 7 il əvvəl Prezident  seçildiyi  tarixdə bitir. Həmin ziddiyyətin aradan qaldırılması üçün məcəllədə dəyişiklik edilməsi zərurəti yaranıb. Deputatlar Seçki Məcəlləsində dəyişikliyə dair qanun layihəsini ikinci oxunuşda məqbul saydılar.
Sonra Əli Hüseynli  İnzibati Xətalar Məcəlləsində dəyişiklik edilməsi barədə məlumat  verdi. Bildirildi ki, Məcəllədə dərman vasitələri haqqında qanunvericiliyin pozulması ilə bağlı bir sıra əlavələr nəzərdə tutulub. Əlavələrə əsasən, dərman vasitələrinin istehsalına, daşınmasına və saxlanmasına, eləcə də topdan satışına dair tələblərin pozulmasına görə məsuliyyət  halları  nəzərdə  tutulur. Məcəllədə aptek təşkilatlarına dair tələblərin pozulmasına görə məsuliyyət halları da müəyyən edilir. Sənəd  ikinci oxunuşda səsə  qoyularaq  təsdiq  edildi.
İqtisadi siyasət, sənaye və sahibkarlıq komitəsinin sədri Ziyad Səmədzadə  bildirdi ki, “Avtomobil nəqliyyatı haqqında” qanunda  dəyişiklik edilməsi  “Yol hərəkəti haqqında”  2018-ci il  23  fevral tarixli  qanunun icrası məqsədilə təklif  edilib. Belə ki,  Azərbaycanın tərəfdar çıxdığı “Beynəlxalq   avtomobil  daşımalarını həyata  keçirən  nəqliyyat  vasitələri heyətinin işinə dair Avropa Sazişi”nə əsasən  ölkəmizdə beynəlxalq  daşımaları  həyata  keçirən  sürücülərin iş və  istirahət  rejiminə  nəzarətin təşkili və bu məqsədlə  rəqəmsal taxoqrafların tətbiqi  nəzərdə  tutulmuşdur. Qanun layihəsi  səsə  qoyularaq  ikinci oxunuşda təsdiqləndi.
İclasın sonunda Ziyad  Səmədzadə  “Sığorta fəaliyyəti haqqında” qanunda dəyişiklik edilməsi barədə sənədi  də ikinci oxunuşda təqdim etdi.  Qeyd  olundu ki, son illərdə  ölkənin maliyyə  və bank sektorunda  baş verən proseslər  sığorta  sektoruna  da  təsirsiz ötüşməmiş, nəticədə  2  sığorta  şirkətinin müflis olmasına,  4 sığorta  şirkətinin könüllü olaraq  bağlanmasına, bəzi  sığorta  şirkətlərinin isə maliyyə  dayanıqlığı riski ilə üzləşməsinə  səbəb olmuşdur.  Sığorta   münasibətlərini tənzimləyən  mövcud  qanunvericilikdə  sığorta  və təkrarsığorta  şirkətlərinin məcburi və könüllü ləğvetmə prosesinin  əhatə olunmasına  baxmayaraq, onların  sağlamlaşdırılması ilə bağlı  müddəa  mövcud  deyildir.  Komitə  sədri sənədə təklif  olunan dəyişikliklərin  kapital  tələblərinə cavab verməyən  sığorta  və təkrarsığorta  şirkətlərinə  vaxtında  müdaxilə edilməsi, həmin şirkətlərin  iflasdan  xilas  edilməsi və iflasa  getdiyi  təqdirdə  istehlakçıların hüquqlarının qorunması  məqsədi ilə şirkətin  vəsaitlərinin  qorunması  üçün hüquqi əsas  yaratdığını  diqqətə  çatdırdı.  Sənəd  səsə  qoyularaq  ikinci  oxunuşda  qəbul edildi.
Bununla da Milli Məclisin  bugünkü  iclası  öz işini başa çatdırdı.

Milli Məclisin
Mətbuat xidməti