Noyabrın 19-da Milli Məclisin Əmək və sosial siyasət, Elm və təhsil, Səhiyyə, Ailə, qadın və uşaq məsələləri, Mədəniyyət komitələrinin  birgə iclası keçirildi.
İclası açan Əmək və sosial  siyasət komitəsinin sədri Hadi Rəcəbli “Azərbaycan Respublikasının 2020-ci il üçün dövlət büdcəsi haqqında” qanun layihəsini ikinci oxunuşda  təqdim etdi. Komitə  sədri daha çox  sosialyönümlülüyü ilə  diqqət  çəkən gələn ilin  büdcə layihəsinin peşəkarlıqla  hazırlandığını vurğuladı.  Bildirildi ki, son illərdə aparılan islahatlar nəticəsində sosial sahəyə ayrılan vəsaitlərin məbləğinin artırılması, büdcənin əhalinin güzəranının yaxşılaşdırılmasına isiqamətləndirilməsi təqdirəlayiq  haldır.
Sonra iclasda  iştirak  edən Maliyyə nazirinin birinci müavini İlqar Fətizadə çıxış edərək qeyd etdi ki,  büdcə layihəsi  birinci oxunuşunda Milli Məclisin müzakirəsindən keçib və  millət  vəkilləri  tərəfindən tutarlı təkliflər  verilib.  Nazir  müavini bu  təkliflərin nəzərə alınacağını dedi və  2020-ci ilin büdcə parametrlərini  yenidən  səsləndirdi.  Qeyd  olundu ki, 2020-ci ilin dövlət büdcəsinin gəlirləri 24 milyard 135 milyon manat, xərcləri isə 26 milyard 914 milyon manat, icmal büdcənin gəlirləri isə 27 milyard 533 milyon manat təşkil edəcək. İcmal büdcə xərclərinin yuxarı həddi 29 milyard 488 milyon manat olacaqdır ki, bu da 2019 illə müqayisədə 2 milyard 117 milyon manat və ya 7,7 faiz çoxdur.  İlqar Fətizadə yeni büdcə layihəsində sosial, elm, təhsil, səhiyyə və mədəniyyət sahələrinin inkişafı üçün kifayət qədər vəsait ayrıldığını diqqətə çatdırdı.
Sonra Elm və təhsil komitəsinin sədri İsa Həbibbəyli çıxış edərək yeni dövlət büdcəsi layihəsinin bütün sahələrdə olduğu kimi, ölkənin elm və təhsilinə də böyük töhfə verəcəyinə əminliyini ifadə etdi.
Səhiyyə komitəsinin sədri Əhliman Əmiraslanov gələn ilin dövlət  büdcəsinin 5,1 faizinin səhiyyə sahəsinə ayrılmasını və  gələn ilin büdcəsində icbari tibbi sıgorta məsələsinə diqqətin artırılmasını humanist addım kimi dəyərləndirdi və buna görə ölkə Prezidentinə təşəkkürünü bildirdi.
Ailə, qadın və uşaq məsələləri komitəsinin sədri Aqiyə Naxçıvanlı  və Mədəniyyət  komitəsinin sədri Rafael Hüseynov da çıxışlarında büdcə layihəsinin  təkmil bir  şəkildə  hazırlandığını vurğuladılar. 2020-il büdcəsinin  milli kinonun inkişafına və yeni filmlərin çəkilməsinə,  xalqımızın milli-mənəvi dəyərlərini əks etdirən uşaqlar haqqında  cizgi və reklam filmlərinin çəkilməsinə ayrılan vəsaitin artırılmasının vacib məsələ olduğunu  qeyd etdilər.
Müzakirələrdə deputatlardan Məlahət İbrahimqızı, Qənirə Paşayeva, Asim Mollazadə, İlham Məmmədov, Rəşad Mahmudov, Novruzəli Aslanov  çıxış edərək Aliment Fondunun yaradılması, kitabxana  və kənd  mədəniyyət  evlərinin  fəaliyyətinin  yenilənməsi,  kənd  yerlərində yeni salınan yaşayış massivlərinin təbii qazla tam təmin olunması məsələlərinə diqqətin artırılması kimi fikirlər  səsləndirdilər.
İclasda iştirak edən İqtisadiyyat nazirinin müavini Sevinc Həsənova çıxış edərək millət vəkillərini maraqlandıran məsələlərə aydınlıq gətirdi.
Müzakirələrdən sonra 2020-ci il dövlət büdcəsi haqqında qanun layihəsi ikinci oxunuşda plenar iclasa tövsiyə olundu.