Martın 16-da Milli Məclisin Əmək və sosial siyasət komitəsinin VI çağırış parlamentdə ilk iclası keçirildi. Komitə  sədri  Musa Quliyev millət  vəkillərinə yeni  sessiyada  uğurlar arzuladı.
Bildirildi ki, iclasın gündəliyinə üç məsələ daxil edilib.  Əvvəlcə millət  vəkilləri “Turizm haqqında” qanuna edilən  dəyişiklikləri  müzakirə etdilər. Musa Quliyev  vurğuladı ki,  bununla bağlı yeni qanun layihəsi hazırlıqlarının davam etdirilməsi nəzərdə tutulur.
Milli Məclis  Aparatının  Sosial  qanunvericilik şöbəsinin sektor müdiri Adil Vəliyev  qeyd etdi ki, sənəd üzərində aparılan dəyişikliklər Azərbaycan  Prezidentinin  2016-cı il 20 oktyabr  tarixli  1082 nömrəli fərmanı ilə təsdiq  edilmiş  “ASAN Viza”  sistemi haqqında  2019-cu il 9 mart  tarixli,  612  nömrəli  dəyişikliklərlə bağlıdır. Fərmanda elektron viza ilə bağlı məsələlərin “Turizm haqqında” qanunda  təsbit  edilməsi  nəzərdə  tutulur.
İclasda sonra “Azərbaycan Respublikası  Hökuməti ilə  Bolqarısatn  Respublikası  Hökuməti  arasında  pensiya  təminatı haqqında”  Sazişin təsdiq  edilməsi  barədə  qanun  layihəsi  nəzərdən keçirildi.
Hər iki sənəd  Milli Məclisin plenar  iclasına tövsiyə  edildi.
Sonra Musa Quliyev  2020-ci ilin yaz  sessiyası dönəmində komitənin qanunvericilik işlər planı barədə məlumatı  diqqətə çatdırdı. Bildirdildi ki,  sessiya  dövründə komitədə iki vacib dinləmə  keçiriləcək. Bunlar əhalinin məşğulluğunun təmin edilməsi sahəsində görülən işlər, digəri isə tütün və tütün məmulatlarından istifadənin məhdudlaşdırılması ilə əlaqədar qanunvericiliyin icrası yönündə ictimai dinləmədir. Birinci ictimai dinləmənin aprel ayında keçirilməsi  nəzərdə tutulub.
Komitə üzvləri Ziyad Səmədzadə, Rauf Əliyev, Məlahət İbrahimqızı, Jalə Əliyeva, Sevinc Hüseynova, İlham Məmmədov, Soltan Məmmədov, Arzu Nağıyev, Vüqar Bayramov, Əziz Ələkbərov, Aqil Məmmədov  yaz  sessiyasının qanunvericilik işləri planı ilə bağlı təkliflərini  səsləndirdilər  və sənəd  təsdiqləndi.

Milli Məclisin
Mətbuat xidməti