Gündəliyin təsdiqindən sonra millət vəkilləri cari məsələləri müzakirə etdilər.  Milli Məclis Sədrinin müavini, Gənclər  və idman komitəsinin sədri Adil Əliyev, komitə  sədrləri Səməd Seyidov, Hicran Hüseynova, Tahir Rzayev, Qənirə Paşayeva,  Sadiq Qurbanov,  deputatlardan Fazil Mustafa, Soltan Məmmədov, Elman Nəsirov,  Razi Nurullayev, Şahin İsmayılov, Tural Gəncəliyev, Sahib Alıyev, Məlahət İbrahimqızı, Jalə Əliyeva,  Ramin Həsən, Cavanşir Paşazadə, Qüdrət Həsənquliyev, Vüqar Bayramov,  Nəsib Məhəməliyev,  Aqiyə Naxçıvanlı ölkə gündəmindəki önəmli məsələlərdən söz  açdılar. Çıxışlarda aqrar sahədə vəziyyət, kənd  təsərrüfatının inkişafına  dəstəyin artırılması, suvarma  sistemlərinin yenilənməsi, qanunların icrasına nəzarət mexanizmlərinin gücləndirilməsi, sosial şəbəkələrdəki mövcud qanunsuzluqların aradan qaldırılması barədə fikirlər  səsləndirildi. 

Sonra gündəliyə daxil edilən İnzibati Xətalar Məcəlləsində dəyişiklik edilməsi haqqında qanun layihəsinin (3-cü oxunuş) müzakirəsinə başlanıldı. Sənədi təqdim edən Milli Məclisin Hüquq siyasəti və dövlət quruculuğu komitəsinin üzvü Fəzail Ağamalı bildirdi ki, ölkəmizdə karantin rejiminin bir qədər yumşaldılması cəmiyyətdə bəzi vətəndaşların məsuliyyətsiz davranışına yol açıb. Parklarda, küçələrdə, ictimai yerlərdə sosial məsafənin qorunmaması, tibbi maskalardan istifadə edilməməsi ciddi narahatlıq doğurur. Bununla əlaqədar Nazirlər Kabineti “Karantin rejimində tənəffüs yollarının qoruyan tibbi maskalardan istifadə qaydalarının tətbiqi ilə əlaqədar” qərar verib. Məcəlləyə edilən dəyişikliklər həmin hüquqi addımların davamıdır. Sənəd pandemiya dövründə sanitar-gigiyena qaydalarının tələblərinin pozulmasına görə inzibati tənbeh hallarını müəyyən edir və bu dövrdə tənəffüs yollarını qoruyan fərdi vasitələrdən istifadə ilə bağlı tələblərin pozulmasına görə cərimələri müəyyənləşdirir. 

Fəzail Ağamalı sənədin parlamentdə əvvəlki oxunuşlarda müzakirəsi zamanı deputat həmkarları  tərəfindən  səsləndirilən  təkliflərə  münasibətini bildirdi, işçi qrupu  tərəfindən dəyərləndirilən  təkliflər barədə danışdı. Qanun layihəsi səsə qoyularaq 3-cü oxunuşda  qəbul edildi.  

Sonra Əmək və sosial siyasət komitəsinin sədri Musa Quliyev  “Ünvanlı dövlət sosial yardımı haqqında” qanunda dəyişiklik edilməsi barədə qanun layihəsi haqqında (üçüncü oxunuş) məlumat verdi. Bildirildi ki, qanun layihəsinin 2-ci oxunuşda Milli Məclisdə  müzakirəsi  zamanı millət vəkillərinin verdikləri dəyərli  təkliflərə  işçi qrupu tərəfindən baxılıb. Komitə  sədri vurğuladı ki, dəyişikliklərin hamısı humanist məqsədlərə xidmət edir, ölkə Prezidentinin ünvanlı sosial yardımın çevrəsini daha da genişləndirmək, əlçatanlığı asanlaşdırmaq, şərtləri yumşaltmaq barədə tövsiyələri əsasında hazırlanıb. Qanun layihəsi  səsvermə yolu ilə təsdiqləndi. 

İclasda İnzibati Xətalar Məcəlləsinə edilən dəyişikliklərə də  (3-cü  oxunuş) baxıldı. Layihə  barədə məlumat verən  Hüquq  siyasəti  və dövlət quruculuğu  komitəsinin üzvü  Nizami Səfərov bildirdi ki, sənəd “Əlilliyi olan şəxslərin hüquqları haqqında” Azərbaycan Respublikasının 2018-ci il 31 may tarixli qanununun icrası ilə əlaqədar hazırlanıb.  Deputat bildirdi ki, qanunun əvvəlki oxunuşlarda parlamentdə müzakirələri zamanı millət vəkilləri  tərəfindən  heç bir yeni  təklif qeydə  alınmamışdır.  Bu  sənəd  də  səsvermə yolu ilə qəbul edildi. 

Bununla da Milli Məclisin bugünkü iclası öz işini başa çatdırdı.