Sentyabrın 21-də  Milli Məclisin Elm və təhsil komitəsinin növbəti onlayn iclası  keçirildi. Komitənin sədri Bəxtiyar Əliyev  bildirdi ki,  gündəliyə “Hüquqi şəxslərin dövlət qeydiyyatı və dövlət reyestri haqqında” və “Peşə təhsili haqqında” qanunlarda dəyişikliklər edilməsi barədə” sənədin müzakirəsi  daxil edilib. 

Qanun layihəsinə  təklif olunan  dəyişiklikləri ətraflı şərh  edən  Bəxtiyar Əliyev  qeyd etdi ki, sənəd “Publik hüquqi şəxslər haqqında” qanunda dəyişiklik edilməsi barədə” 2019-cu il 12 iyul tarixli qanunun icrası ilə əlaqədar hazırlanıb. Sözügedən qanunun 4-cü maddəsinə uyğun olaraq publik hüquqi şəxs, dövlət adından, müvafiq icra hakimiyyəti orqanının müəyyən etdiyi qurum tərəfindən yaradılır. Publik hüquqi şəxs “Hüquqi şəxslərin dövlət qeydiyyatı və dövlət reyestri haqqında” qanunla müəyyən edilmiş qaydada müvafiq icra hakimiyyəti orqanı tərəfindən dövlət qeydiyyatına alındıqdan sonra hüquqi şəxs statusunu əldə edir. Müvafiq icra hakimiyyəti orqanı tərəfindən yaradılan publik hüquqi şəxsin dövlət qeydiyyatı onun idarəetmə orqanlarının üzvləri tam tərkibdə təyin edilmədiyi halda da həyata keçirilir. Buna əsaslanaraq “Hüquqi şəxslərin dövlət qeydiyyatı və dövlət reyestri haqqında” qanunun 5.4 və 8.1-ci maddələri həmin müddəalara uyğunlaşdırılır.  Müzakirəyə  çıxarılan “Peşə təhsili haqqında” qanunun 16.2-ci maddəsi isə  “Təhsil haqqında”  qanunun  32.2-ci maddəsinə uyğunlaşdırılır.  Komitə  üzvləri  Musa  Qasımlı,  Rafael  Hüseynov, Etibar Əliyev,  Müşfiq  Məmmədli, Kamilə Əliyeva,  Şahin Seyidzadə,  Ceyhun Məmmədov sənədlə  bağlı qeyd və təkliflərini bildirdilər.

 Sənədin Milli Məclisin plenar iclasına  tövsiyə  edilməsi məqsəduyğun hesab  edildi. 

Sonra  onlayn  toplantıda  komitənin cari işləri ilə bağlı  fikir  mübadiləsi  aparıldı. “Ali təhsil haqqında” qanun layihəsinin hazırlanması ilə bağlı yaradılmış işçi  qrupun  tərkibinə  dəyişiklik müzakirə olundu və  təsdiq  edildi.   Bəxtiyar Əliyev  qanun layihəsi ilə bağlı oktyabr  ayının əvvəlləri üçün geniş ictimai dinləmələrin  keçirilməsinin planlaşdırıldığını  diqqətə çatdırdı.   

Milli Məclisin Mətbuat  və 

ictimaiyyətlə əlaqələr şöbəsi