Oktyabrın 22-də MDB  Parlament Assambleyası  nəzdində Səhiyyə  üzrə  Ekspert  Şurasının  videokonfrans  formatında iclası  keçirildi. Görüşdə  Milli Məclisin deputatı,   Səhiyyə komitəsinin üzvü  Anatoliy Rafailov  iştirak  edirdi.

Görüşü  qurumun  Baş katibi – Katiblik  Şurasının  rəhbəri  Dmitri Kobitski  açaraq  iştirakçıları  salamladı, COVİD-19 virusunun dünyanı  təhdid  etdiyi  bir  zamanda   belə bir  fikir  mübadiləsinin  faydalı  olacağına  ümidvar  olduğunu  bildirdi.  

Gündəliyin  təsdiqindən sonra MDB PA nəzdində səhiyyə üzrə  Ekspert Şurasının  sədri  Yuri Şerbukun “İctimai səhiyyə -  problemlər  və perspektivlər” mövzusunda  məruzəsi dinlənildi.  Məruzədə infeksiya ilə səmərəli mübarizənin təmin olunması üçün beynəlxalq əməkdaşlığın  gücləndirilməsi, MDB üzvü  olan  ölkələr  arasında  səylərin səfərbər olunması, qlobal həmrəyliyin zəruriliyi xüsusi  qeyd  olunurdu.  Yuri Şerbuk  vurğuladı ki, COVID-19 infeksiya¬sının yaratdığı reallığa  əvvəllər heç bir ölkədə rast  gəlinməyib.  Buna görə də, indi pandemiya bütün dünya  və  eləcə  də quruma  üzv  olan  ölkələr  üçün ümumi bəla və ciddi imtahan sayılır. Vəziyyət bəşəriyyət üçün hələ də ciddi  təhlükə mənbəyi olaraq qalmaqdadır. Üzv  ölkələrdə genişmiqyaslı tədbirlərin həyata keçirilməsinə,  karantin  qaydalarının  tətbiqinə,  sosial məsafə  qaydalarına  riayət  olunmasına  baxmayaraq  virusun yayılması və  artımı müşayiət  olunur, problem hələ də öz mürəkkəbliyini qoruyur.  Qeyd  olundu  ki, belə bir vəziyyətdə MDB-yə üzv olan ölkələrin səhiyyə  sistemlərinin  də  görünməyən düşmənə qarşı həmrəylik göstərməsinə böyük ehtiyac var. Üzv ölkələrdəki situasiyaların daha  da  gərginləşməməsi  üçün mövcud  diaqnostik  metodlar, effektiv müalicə  üsulları, uzunmüddətli  stasionar müalicə  keçən  xəstələrin adaptasiyası məsələləri ilə bağlı  qarşılıqlı  təcrübə   mübadiləsi  olduqca  səmərəli ola bilər. 

Məruzəçi  çıxışında pandemiya  prosesində alkoqollu içkilərin  və  tütün məmulatlarından  istifadənin  prosesləri  sürətləndirməsindən,  dünya  ölkələri  arasında  ana  və uşaq ölümləri hallarının artmasından,  onkoloji  xəstəliklərlə  mübarizə  sahəsində əməkdaşlıqdan,  qəzalı vəziyyətdə olan  xəstəxanaların   tezliklə bərpa  edilməsinin və  stasionar  tibb təşkilatlarının texniki  təchizatının  gücləndirilməsinin vacibliyindən geniş söhbət  açdı. MDB-yə  üzv  ölkələrlə  müqayisədə inkişaf  etmiş Avropa  ölkələrində  xəstəliyin artım  trayektoriyasını  diqqətə çatdırdı.

Sonra  onlayn iclasda  Ümumdünya  Səhiyyə  Təşkilatının  Avropa  regional Bürosunun  nümayəndəsi Oqtay Gözəlov  MDB-yə  üzv  ölkələrdə  biotəhlükəsizlik  məsələləri, COVİD 19 və mövsümı qrip  virusları ilə  mübarizə  metodları  barədə  danışdı. Bu virusların müalicəsində effektiv  təsirə  malik  dərman  preparatlarının istehsalının artırılmasının, bu  sahədə  defisitliyin aradan  qaldırılmasının zəruriliyini qeyd  etdi. Ağır xəstələr, yaşlılar, xroniki xəstəliyi olanlarla bağlı intensiv-terapiya sistemlərinin  sayının  coxaldılmasının  vacibliyi  bildirildi. 

Onlayn iclasda  ÜST  Avropa regionu üzrə  səhiyyə  Departamentinin  rəhbəri Davron Muxamedov çıxış  edərək Beynəlxalq  Qırmızı Xaç və Qızıl Aypara  cəmiyyətlərinin  koronovirus  infeksiyası  sahəsində  gördüyü  işlərdən, göstərilən yardımlardan,  üzv ölkələr  tərəfindən verilən  ianələrdən  söhbət  açdı. O, mübarizə metodlarinda  könüllülərin fəaliyyətinin genışləndirilməsi və maarifləndirici tədbirlərin artırılmasının vacibliyini  vurğuladı.  

Toplantıda Rusiya Federasiyası səhiyyə  nazirinin müavini Oleq Qrıdnov  da çıxış  edərək koronavirus pandemiyası ilə mübarizədə Rusiyanın  vaksin profilaktikası proqramları, tibbi  personalın  pandemiyanın  təsirlərindən qorunması,  bu qlobal təhlükə ilə mübarizədə dünya dövlətlərinin həmrəyliyinin möhkəmlənməsi  barədə  danışdı. Dünyada cərəyan edən pandemiya  böhranının nəticələrinin aradan qaldırılmasına, beynəlxalq əməkdaşlığın gücləndirilməsinə, üzv dövlətlər arasında qarşılıqlı etima¬dın möhkəmləndirilməsinə, dünya əhalisinin sağlamlığının qorunmasına xidmət edəcək addımların  təqdirəlayiq  olduğunu bildirdi. 

Sonra iclas  “Koronavirus pandemiyasından sonrakı dövrdə sağlam cəmiyyətin  formalaşdırılması”,  “Pandemiya  şəraitində  dövlətlərin  iqtisadi idarəetməsi”, “Bioloji təhlükəsizlikdə qrip problemi”, “MDB-yə  üzv olan  dövlətlərdə 2020-2022-ci illər  üçün model  qanunvericilik planı və təkliflər”  mövzularında çıxışlarla  davam  etdirildi.

İclasa  yekun vuran MDB PA nəzdində səhiyyə üzrə  Ekspert Şurasının  sədri  Yuri Şerbuk bugünkü  fikir  mübadiləsinin  səmərəli olduğunu dedi və  qurumun növbəti toplantısının gələn ilin mart-aprel aylarında  Sankt-Peterburqda  keçirilməsinin nəzərdə tutulduğunu  bəyan etdi.