Oktyabrın 18-də Bakının Yasamal rayonunda 44 günlük Vətən müharibəsinin şəhidi Feyruz Hacılının xatirəsi yad edilib.

Tədbirdə Milli Məclisin deputatları Ülvi Quliyev, Erkin Qədirli, Səbinə Xasayeva, Yasamal rayon İcra Hakimiyyətinin başçısı Elşad Həsənov, rayonun idarə və təşkilatlarının rəhbərləri, şəhidin döyüş yoldaşları və ictimaiyyətin nümayəndələri iştirak ediblər.

Şəhid əsgərin Yasamal rayonunda yerləşən II Fəxri Xiyabandakı məzarı ziyarət edilib, ruhuna dualar oxunub, məzarı önünə güllər qoyulub. Mərasimdə şəhid hərbi qulluqçunun keçdiyi cəsur döyüş yolu barədə danışılıb.

Bildirilib ki, Feyruz Hacılı  Vətən müharibəsində göstərdiyi qəhrəmanlıqlara görə  “Vətən uğrunda”, "Cəbrayılın azad olunması uğrunda" və "Füzulinin azad olunması uğrunda"  medalları ilə təltif edilib.

Mərasimdə çıxış edən şəhidin yaxınları öz xatirələrini bölüşüblər, ölkə rəhbərliyinə şəhid ailələrinə və qazilərə göstərilən diqqət və qayğıya görə  minnətdarlıqlarını bildiriblər.

Milli Məclisin Mətbuat və
ictimaiyyətlə əlaqələr şöbəsi