Noyabrın 13-də Milli Məclisin Regional məsələlər komitəsinin növbəti iclası keçirildi. İclası açan komitənin sədri Arif Rəhimzadə iclasda “Qəbələ rayonunun inzibati ərazi bölgüsündə qismən dəyişikliklər  edilməsi  haqqında” qanun layihəsinin müzakirə olunacağını bildirdi.
Sənəd  barədə iclas iştirakçılarına ətraflı məlumat verən komitə sədri qeyd  etdi ki, ölkə rəhbərliyi  tərəfindən  əsrarəngiz təbiətə malik olan Qəbələ rayonuna göstərilən xüsusi diqqət sayəsində bura Azərbaycanın mədəni  mərkəzlərindən birinə çevrilib. Burada yeni sənaye obyektlərinin tikintisi, beynəlxalq uçuşların da həyata  keçirildiyi  aeroportun açılışı, Azərbaycanda yeganə olan Qolf Mərkəzinin  istifadəyə  verilməsi  rayonun sürətli inkişafına  zəmin yaradıb.  Bildirildi ki, bu səbəbdən də  rayona ətraf ərazilərdən,  bələdiyyə reyestrində olan 144 hektar  əlavə torpaq sahəsinin verilməsi ilə bağlı  qanun layihəsi çox  aktual  xarakter  daşıyır.
Komitə  sədrinin müavini, Qəbələ rayonundan seçilmiş deputat Fəttah Heydərov da  rayonda  gedən sürətli inkişafdan, turizm üçün  olduqca əlverişli  mühitdən danışdı. Qanun layihəsinin  əhəmiyyətini vurğuladı. 
Komitə üzvləri  yekdilliklə sənədin  Milli Məclisin müzakirəsinə  təqdim olunması barədə qərar qəbul etdilər.    

        
Milli Məclisin
Mətbuat  xidməti