Azərbaycanın Türkiyədəki səfirliyinin Azərbaycanlı Həkimlər Dərnəyi bu ölkənin Sağlıq Bilimləri Universitetində “Qarabağ Zəfəri. Həkim gözü ilə qardaşlıq dastanı” adlı tədbir  keçirib. Sağlıq Bilimləri Universiteti ilə  birgə təşkil olunan tədbir şəhidlərin əziz xatirəsinin bir dəqiqəlik sükutla yad edilməsi ilə başlayıb.

Əvvəlcə iki qardaş ölkənin dövlət himnləri səsləndirilib. Tədbirdə Azərbaycanın tarixi, Vətən müharibəsindəki Zəfəri və Türkiyədə təhsil alan azərbaycanlı həkimlərin müharibə dövründəki fədakarlığını əks etdirən videomaterial nümayiş olunub.

Çıxış edən Azərbaycanın Türkiyədəki səfiri Rəşad Məmmədov, Sağlıq Bilimləri Universitetinin rektoru professor Cevdet Erdöl, Milli Məclisin Səhiyyə komitəsinin sədri, akademik Əhliman Əmiraslanov, Türkiyə Parlamentinin Azərbaycanla dostluq qrupunun rəhbəri Şamil Ayırım Azərbaycanın 44 günlük Vətən müharibəsindəki şanlı Zəfərinin, eyni zamanda Türkiyənin və bütün türk millətinin zəfəri olduğunu bildiriblər. 84 milyonluq Türkiyənin müharibənin ilk anlarından etibarən Azərbaycanın yanında olduğu qeyd edilib. Bildirilib ki, Azərbaycan xalqı bunu heç vaxt unutmayacaq.

Tədbirdə çıxış edən tibb xidməti mayoru Anar Aslanov bildirib ki, Sağlıq Bilimləri Universitetinin Tibb fakültəsində işləyən və ixtisas artıran 30 hərbi həkim Vətən müharibəsi başladıqdan dərhal sonra ailələrini, işlərini qoyaraq könüllü şəkildə Azərbaycana qayıdıblar. Onlar yaralı hərbçilərimizə tibb xidməti göstərməkdən, Zəfərin bir parçası olmaqdan qürur hissi keçirirlər.

Sonra Azərbaycanlı Həkimlər Dərnəyinin rəhbəri Fərid Qasımzadə, həmin dövrdə Vətənə qayıdan mülki həkimlər və toplanan tibbi ləvazimat yardımları haqqında məlumat verib.

Daha sonra həkimlərə Azərbaycanın Türkiyədəki səfirliyinin Fəxri fərmanı təqdim edilib.

Tədbir Azərbaycan Müdafiə Nazirlinin Heydər Əliyev adına Ali Hərbi Məktəbinin orkestrinin konserti ilə yekunlaşıb.

Milli Məclisin Mətbuat və
ictimaiyyətlə əlaqələr şöbəsi