Milli Məclisin deputatı, Azərbaycan   Həmkarlar   İttifaqları   Konfederasiyasının  sədri  Səttar Möhbalıyev Vətən müharibəsi  şəhidləri - polkovnik-leytenant   Sədi   Süleyman oğlu Musayevin   və   baş  leytenant Tural  Ələmdar oğlu Əsgərlinin  Bakının Xətai rayonunda və Ramana qəsəbəsində yaşayan ailələrini  ziyarət  edib.

Şəhid ailələri ilə söhbət zamanı Səttar Möhbalıyev Ali Baş Komandan, Prezident İlham Əliyevin  rəhbərliyi  ilə Azərbaycan Ordusunun  İkinci  Qarabağ  müharibəsində  iştirak   edən  hər  bir əsgər   və  zabitinin  Böyük   Zəfərimizin  əldə   olunmasında   misilsiz   xidmətlər  göstərdiklərini,  onların qəhrəmanlıqlarının  heç  zaman  unudulmayacağını  diqqətə çatdırıb.

AHİK   sədri  fəxrlə  bildirib  ki,  torpaqlarımızın  azad  olunmasında  iştirak  edən zabitlərimizin   əksəriyyəti  vaxtilə  Ulu  öndərin  təşəbbüsü  ilə  yaradılan  hərbi məktəblərimizin yetirmələridir. Cəmşid Naxçıvanski adına Hərbi Liseyin, Heydər Əliyev  adına  Hərbi  Liseyin, Heydər Əliyev adına Azərbaycan Ali Hərbi Məktəbinin yüzlərlə yetirməsi olan zabitlər Qarabağın işğaldan azad olunması  uğrunda döyüşlərdə fəal iştirak edərək xalqımızın 30 illik həsrətinə son qoyublar.

Səttar Möhbalıyev şəhidlərimizin şücaətindən söz açıb, onların doyüş yolunun gələcək nəsillər üçün nümunə olacağını, Vətən uğurunda canını fəda edən qəhrəmanların əbədiyyətədək xalqımızın yaddaşında yaşayacağını vurğulayıb.

Qeyd edək ki, Azərbaycan  Ordusunun  polkovnik-leytenantı  Sədi Musayev Azərbaycanın ərazi  bütövlünün  bərpa olunması üçün başlanan Vətən müharibəsi zamanı Füzulinin  azadlığı  uğrunda gedən döyüşlərdə  savaşıb. O, sentyabrın 28-də Füzuli  döyüşləri zamanı Yuxarı Əbdürrəhmanlı kəndi istiqamətində gedən döyüşlərdə şəhid olub.

Prezident  İlham  Əliyevin  müvafiq  sərəncamlarına  əsasən, Sədi  Musayev ölümündən sonra “Azərbaycan Bayrağı” ordeni, “Vətən uğurunda”, “Füzulinin azad olunmasına görə” və “ Xocavəndin azad olunmasına görə” medalları ilə təltif edilib. 

Sədi  Musayevin  bizə  əmanət  qoyub  getdiyi  bir  oğul və  bir  qız  övladı  hər  zaman diqqətimizdədir.

Baş  leytenant  Tural  Əsgərli  isə 44 günlük Vətən müharibəsində Murovdağ və Kəlbəcər uğurunda gedən döyüşlərdə qəhrəmanlıqla iştirak edib. Oktyabrın 1-də Kəlbəcər uğrunda gedən döyüşlər zamanı şəhadətə qovuşub. Prezident İlham Əliyevin sərəncamları ilə baş leytenant Əsgərli Tural Ələmdar oğlu ölümündən sonra “Vətən uğurunda” və  “Kəlbəcərin azad olunmasına  görə” medalları  ilə  təltif olunub.                     

Şəhidin  iki qız övladı yadigar qalıb.

Səttar Möhbalıyev şəhid ailələrinin arzu və istəklərini dinləyib, problemləri ilə maraqlanıb.

Milli Məclisin Mətbuat və

                                           ictimaiyyətlə əlaqələr şöbəsi