8 Noyabr – Zəfər Günü münasibəti ilə Misir parlamentinin sabiq birinci vitse-spikeri, Seyyidlər İttifaqının sədri Seyyid Mahmud Şərif Milli Məclisin sədri Sahibə Qafarovaya və Azərbaycan-Misir parlamentlərarası əlaqələr üzrə işçi qrupunun rəhbəri, deputat Ceyhun Məmmədova təbrik məktubları göndərib.

Seyyid Mahmud Şərif təbrik məktublarında qardaş Azərbaycan Respublikasının Prezident İlham Əliyevin müdrik və uzaqgörən rəhbərliyi ilə daim əmin-amanlıq və tərəqqi içində yaşamasını arzulayıb.

Ən səmimi arzu və təbriklərini çatdırmaqdan iftixar və məmnunluq duyduqlarını bildirən sabiq birinci vitse-spiker vurğulayıb ki, qardaş Azərbaycana beynəlxalq səviyyədə tanınmış torpaqlarını qaytaran bu Zəfər həm Azərbaycanın, həm də bütövlükdə regionun inkişafına  və çiçəklənməsinə töhfə verəcək.

Ölkəmizə etdiyi səfərlər zamanı burada ən müxtəlif sahələrdə inkişafın şahidi olduğunu məmnunluqla qeyd edən Seyyid Mahmud Şərif, eyni zamanda, Azərbaycanda dinc yanaşı yaşamağın və plüralizm dəyərlərinin bariz nümunəsini gördüyünü, həmçinin xalqlarımız arasında dərin məhəbbətin olduğunu vurğulayıb.

Milli Məclisin Mətbuat və
ictimaiyyətlə əlaqələr şöbəsi