Yanvarın 25-də Milli Məclisin Müdafiə, təhlükəsizlik və korrupsiya ilə mübarizə komitəsinin 2022-ci ilin yaz sessiyasında onlayn formatda ilk iclası keçirilib. Komitə sədri Ziyafət Əsgərov iclası açaraq gündəliyə payız sessiyasının hesabatının, yaz sessiyasının iş planının və bir qanun layihəsinin daxil edildiyini deyib.

Sonra Ziyafət Əsgərov 2021-ci ilin payız sessiyası ərzində komitədə görülən işlər barədə məlumat verib.  Bildirilib ki, hesabat dövründə 21 iclas keçirilib,  8 məsələyə baxılıb. Belə ki, ötən sessiyada komitədə “Azərbaycan Respublikası Hökuməti ilə Türkiyə Respublikası Hökuməti arasında Azərbaycan Ordusu və Türkiyə Silahlı Qüvvələrinin xüsusi təyinatlıların təliminə dair” Anlaşma Memorandumunun təsdiq edilməsi haqqında”, “Hərbi qulluqçuların dövlət icbari şəxsi sığortası haqqında” qanunda dəyişiklik edilməsi barədə”, “Kəşfiyyat və əks-kəşfiyyat haqqında” qanunda dəyişiklik edilməsi barədə” və bir sıra digər  qanun layihələri müzakirə olunub. Komitə üzvləri “Azərbaycan Respublikasının 2022-ci il dövlət  büdcəsi haqqında” qanun layihəsinin komitələrin birgə iclaslarında müzakirələri zamanı fəal iştirak ediblər. Komitə tərəfindən Azərbaycanın Vətən müharibəsində möhtəşəm Qələbəsinin 1-ci ildönümünə həsr olunmuş bir sıra konfranslar, həmçinin Vətən müharibəsi qaziləri, hərbçilərlə görüşlər də təşkil olunub. Ziyafət Əsgərov komitə üzvlərinin ölkədə və dünyada baş verən proseslərə operativ münasibət bildirdiklərini, kütləvi informasiya vasitələrində fəal olduqlarını xüsusi qeyd edib.

Hesabatla bağlı çıxış edən komitə sədrinin müavini Hikmət Məmmədov və komitə üzvü Elman Məmmədov bildiriblər ki, ötən müddət komitə üçün məhsuldar olub. Sessiya ərzində deputatlar qanunvericilik fəaliyyəti ilə yanaşı, ictimai fəallıq nümayiş etdiriblər, mətbuatda müdafiə və təhlükəsizlik məsələlərinə dair şərhlər veriblər. Millət vəkilləri çıxışlarında, həmçinin işğaldan azad edilmiş torpaqlarımızda həyata keçirilən quruculuq işlərini təqdir ediblər, hal-hazırda da bu ərazilərdə abadlaşdırmanın uğurla davam etdiyini söyləyiblər.

Komitənin 2021-ci ilin payız sessiyasının hesabatı məqbul hesab edilib.

2022-ci ilin yaz sessiyası üçün komitənin iş planını təqdim edən Ziyafət Əsgərov diqqətə çatdırıb ki, bu sessiya ərzində qanunvericilik təşəbbüsü qaydasında daxil olan  qanun layihələrinin, mövcud qanunlara ediləcək dəyişikliklərin müzakirəsi, habelə komitəyə müvafiq orqanlardan və vətəndaşlardan daxil olan təkliflərin təhlili və ümumiləşdirilməsi, vətəndaşların qəbulunun, ərizə və şikayətlərlə işin təşkili nəzərdə tutulub. İş planına “Hərbi qulluqçuların statusu haqqında” qanun layihəsinin daxil edildiyini deyən komitə sədri sənədin yüksək səviyyədə hazırlandığını, müvafiq dövlət qurumlarından müsbət rəylərin verildiyini bildirib.

Komitənin 2022-ci ilin yaz sessiyası üçün iş planı təsdiq edilib.

Daha sonra iclasda “Azərbaycan Respublikasının Silahlı Qüvvələri haqqında” qanunda dəyişiklik edilməsi barədə qanun layihəsinə (birinci oxunuş) baxılıb. Bildirilib ki, qanunun  9.6-cı maddəsi yeni redaksiyada təklif olunur. Dəyişikliyə əsasən, Azərbaycan Ordusunun və başqa silahlı birləşmələrin hər biri üçün ayrılıqda dinc və müharibə (silahlı münaqişə) dövrlərində maddi-texniki vasitələrlə təmin edilməsi qaydası və təminat norması müvafiq icra hakimiyyəti orqanı tərəfindən müəyyən edilir.

Layihə Azərbaycanın ərazi bütövlüyü uğrunda 2020-ci il sentyabrın 27-dən noyabrın 10-dək aparılan döyüş əməliyyatlarında əldə edilmiş təcrübə əsasında hazırlanıb. Məqsəd bütün növ qoşunların maddi-texniki bazasının ən yüksək səviyyədə təmin edilməsidir.

Komitə üzvləri Elman Məmmədov və Arzu Nağıyev layihə barədə fikirlərini söyləyiblər, dəyişikliyin ordunun modernləşdirilməsi baxımından vacibliyini qeyd ediblər.

Müzakirələrdən sonra “Azərbaycan Respublikasının Silahlı Qüvvələri haqqında” qanunda dəyişiklik edilməsi barədə qanun layihəsi birinci oxunuşda Milli Məclisin plenar iclasına tövsiyə olunub.

İclasda komitə üzvləri Aqil Abbas, Əminə Ağazadə, Oqtay Əsədov, Nurlan Həsənov, Elşad Mirbəşir oğlu, Aydın Mirzəzadə və Bəxtiyar Sadıqov  iştirak ediblər.

Milli Məclisin Mətbuat və
ictimaiyyətlə əlaqələr şöbəsi