Dekabrın 25-də Milli Məclisin Təhlükəsizlik və müdafiə komitəsinin iclası oldu. Komitənin sədri, Milli Məclis Sədrinin I müavini Ziyafət Əsgərov gündəlikdəki məsələ barədə məlumat verdi.
Bildirildi ki, “Azərbaycan Respublikası Hökuməti və İtaliya Respublikası Hökuməti arasında müdafiə sahəsində əməkdaşlıq haqqında Saziş” 9 maddədən ibarətdir. Sənəddə əməkdaşlığın prinsipləri və sahələri öz əksini tapıb. Sazişə görə ölkələrimiz təhlükəsizlik və müdafiə siyasəti, hərbi-siyasi, sülhü dəstəkləmə və humanitar əməliyyatlar, ətraf mühit, hərbi təhsil, təlim, tibb xidməti və idman sahələrində əməkdaşlıq edəcəklər.
Ziyafət Əsgərov qanun layihəsini ətraflı şərh etdikdən sonra vurğuladı ki, sənəd milli və dövlət maraqlarımıza uyğundur. Müzakirə zamanı deputatlar Elman Məmmədov, Fərəc Quliyev və Aqil Abbasov da sənədin əhəmiyyətini yüksək dəyərləndirdilər.
Fikir mübadiləsinin yekununda bu Sazişin təsdiqlənmək üçün parlamentə təqdim olunması qərara alındı.

Milli Məclisin
Mətbuat xidməti