Milli Məclisdə görüş

Tədbirlər
29 sentyabr 2022 | 18:07   
Paylaşın:        

Sentyabrın 29-da Milli Məclisin bir qrup deputatı - Səməd Seyidov, Qənirə Paşayeva, Sevinc Fətəliyeva və Asim Mollazadə YUNESKO-nun Afrikanın müxtəlif ölkələrindən olan məsul şəxsləri ilə görüşüb.

"Diplomatiyada parlamentin rolu" mövzusuna həsr olunan görüş ADA Universiteti və Azərbaycanın YUNESKO üzrə Milli Komissiyası ilə əməkdaşlıq çərçivəsində Milli Məclisdə keçirilib.

Tədbiri açan Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov qonaqları salamlayaraq Azərbaycan parlamenti, siyasi partiyaların, qadınların, millətlərin parlamentdə təmsilçiliyi barədə məlumat verib.

Parlament diplomatiyasının müasir beynəlxalq münasibətlər sistemində əhəmiyyətini qeyd edən Səməd Seyidov Azərbaycanın qlobal miqyasda parlamentlərarası əməkdaşlığa böyük əhəmiyyət verdiyini vurğulayıb. O, Qoşulmama Hərəkatının sədri olan Azərbaycanın təşəbbüsü ilə Qoşulmama Hərəkatının Parlament Şəbəkəsinin təsis edilməsindən və Parlament Şəbəkəsinin Bakıda keçirilən ilk konfransından söz açıb. Komitə sədri Qoşulmama Hərəkatının Parlament Şəbəkəsinin beynəlxalq sülhün və təhlükəsizliyin möhkəmləndirlməsi, beynəlxalq diplomatiyada parlamentlərin rolunun artırılması istiqamətində əhəmiyyətindən danışıb.

Səməd Seyidov həmçinin Azərbaycanın 44 günlük Vətən müharibəsində öz torpaqlarını azad etməsindən danışaraq, Ermənistanın 30 illik işğalının acı nəticələrinin aradan qaldırılması, regionda sülhün və iqtisadi əməkdaşlığın möhkəmləndirilməsi istiqamətində ölkəmizin gördüyü işlər barədə qonaqlara ətraflı məlumat verib.

Görüşdə Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva və komitə üzvü Asim Mollazadə çıxış ediblər. Deputatlar Azərbaycanın mədəni, dini və etnik müxtəlifliyi əsrlərdir qoruyub saxlamasından, onun tolerantlıq ənənələrindən danışıblar. Bildirilib ki, Şərqdə ilk parlament, ilk demokratik, hüquqi və dünyəvi dövlət məhz Azərbaycanda elan edilib, qadınlara seçmək və seçilmək hüququ verilib. Qonaqlara Milli Məclisin beynəlxalq təşkilatlarda iştirakı, parlamentdə fəaliyyət göstərən dostluq qrupları barədə məlumat verilib.

Sonra Səməd Seyidov, Asim Mollazadə və Sevinc Fətəliyeva beynəlxalq əməkdaşlıq, diplomatiyada parlamentlərin rolu və parlament diplomatiyasının imkanları kimi mövzularda qonaqların səsləndirdikləri sualları cavablandırıblar. Deputatlar diplomatiyanın müasir tendensiyaları, diplomatiyada parlamentin rolu, Azərbaycanın Afrika ölkələri ilə YUNESKO çərçivəsində münasibətlərinin daha da inkişaf etdirilməsi ilə bağlı fikirlərini bölüşüblər.

Milli Məclisin Mətbuat və
ictimaiyyətlə əlaqələr şöbəsi



Azərbaycan Respublikasının Milli Məclisi — Azərbaycan Respublikasında qanunvericilik hakimiyyətini həyata keçirən dövlət hakimiyyəti orqanı. Birpalatalı orqan olub 125 deputatdan ibarətdir. Deputatlar majoritar seçki sistemi, ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə seçilirlər. Azərbaycan Respublikası Milli Məclisinin hər çağırışının səlahiyyət müddəti 5 ildir.

AZ EN RU