Fevralın 27-də Milli Məclisin Sosial siyasət komitəsinin növbəti iclası  keçirildi.  Komitə sədri  Hadi Rəcəbli bildirdi ki,  bugünkü  iclasın gündəliyinə    “Uşaqların icbari dispanserizasiyası haqqında” qanun layihəsinin ikinci  oxunuşda müzakirəsi daxil edilib.
Layihə barədə  məlumat verən Milli Məclis Aparatının Sosial  qanunvericilik şöbəsinin müdiri Adilə Abasova  bildirdi ki,  qanun ilk oxunuşda  Milli Məclisdə  bütövlükdə bəyənildi. Müzakirələr  zamanı millət  vəkilləri bir çox  maraqlı təkliflərlə çıxış etdilər  və bu təkliflərin əksəriyyəti işçi qrupu  tərəfindən nəzərə alındı.  Qeyd  edildi  ki, qanunda nəzərdə tutulan müddəaların pozulmasına görə pasiyentin məhkəməyə müraciət etmək hüququ, eyni zamanda qanunu pozan hüquqi, fiziki və vəzifəli şəxslərin inzibati məsuliyyətə cəlb olunması öz əksini tapıb. Sənədin qəbulundan sonra İnzibati Xətalar və Cinayət məcəllələrinə müvafiq əlavə və dəyişikliklərin olunacağı qeyd  olundu.
Hadi Rəcəbli belə bir  fikri  vurğuladı ki, sənədin reallaşdırılması böyük maliyyə vəsaiti tələb etsə də, hörmətli Prezidentimiz İlham Əliyev uşaqların  sağlamlığını, onlara qayğı və diqqəti  hər şeydən üstün tutmuş,  qanun layihəsini Milli Məclisə təqdim etmişdir. Komitə sədri qanunun tətbiqi ilə bağlı ciddi maarifləndirmə işlərinin aparılmasını vacib  saydı.   
Komitə  sədrinin müavini Musa Quliyev isə dispanserizasiya xidmətinin əhaliyə daha da yaxınlaşdırılması üçün xüsusi avtomobillərin - lazımı tibbi texnika ilə təchiz olunmuş səyyar tibbi maşınların ayrılmasını təklif etdi. Qeyd  olundu ki, bu, kənd yerlərində yaşayan uşaqların müayinələrinin aparılmasına çox kömək edəcək.
Müzakirələr zamanı çıxış edən deputat Əhliman Əmiraslanov bildirdi ki, dispanserizasiyasının  düzgün  aparılması  uşaqlar  arasında  bir çox patoloji xəstəliklərin vaxtında araşdırılıb aradan qaldırılmasına  imkan yaradacaq. Bu, eyni zamanda xərclənən maliyyə vəsaitinin azalmasına, uşaqların sağlam böyüməsinə şərait yaradacaq.
Millət  vəkilləri  bu sahədə  kadr  hazırlıqlarına  başlanılmasının da  vacibliyini  qeyd  etdilər.
Sənədin ikinci oxunuşda parlamentin plenar iclasının müzakirəsinə  çıxarılması qərara  alındı.
 
Milli Məclisin
Mətbuat  xidməti