Mayın  2-də Milli Məclisin İqtisadi siyasət komitəsinin növbəti  iclası  keçirildi. İclası açan komitə  sədri Ziyad Səmədzadə gündəlikdəki  məsələlərlə  deputatları  tanış etdi.Əvvəlcə komitə üzvləri “Avtomobil yolları haqqında” qanun  layihəsinə  dəyişiklikləri  müzakirə  etdilər. 

Sənədlə  bağlı məlumat verən Nəqliyyat Nazirliyinin şöbə müdiri Aydın Süleymanlı  bildirdi ki,  bununla  bağlı mövcud  qanun 1999-cu ildə  qəbul  edilib. Aradan  keçən 14  il ərzində  ölkənin  yol- nəqliyyat  sistemində əsaslı dəyişikliklər  baş  verib ki, bu da qanunvericiliyin  təkmilləşdirilməsi zərurətini yaradır. Qeyd olundu ki, yeni layihədə  yüklü  və yüksüz   iritonajlı  nəqliyyat  vasitələri  üçün  alternativ  yolların çəkilişi, ödənişli  yolların salınması, dövlət  mülkiyyətində olan yollarda  qorunma  zolaqları, avtomobil  yollarının ehtiyat  zonaları  ilə bağlı bir  sıra  mühüm məsələlər   öz  əksini tapıb. Sənəddə həm də avtomobil yolları şəbəkəsinin müasirləşdirilməsi və genişləndirilməsi,  yol təsərrüfatının inkişaf etdirilməsi, yollarda yüksək sürət rejiminin və təhlükəsizlik tələblərinin təmin olunması məqsədilə, dövlət mülkiyyətində olan, yerli və respublika əhəmiyyətli yollarda yüksək standartlara və normativlərə uyğun ödənişli avtomobil yollarının yaradılması nəzərdə tutulur.  Qanun layihəsində dövlət mülkiyyətində olan avtomobil yollarında gediş haqqının avtomobil yolunun dərəcəsi nəzərə alınmaqla müvafiq icra hakimiyyəti tərəfindən müəyyən edilməsi  nəzərdə tutulur. 
Deputatlardan  Vahid  Əhmədov, Xanhüseyn Kazımlı, İlham Əliyev, Cavid  Qurbanov, Əli Məsimli sənədə  edilən  dəyişiklikləri razılıqla  qarşıladılar.
Komitənin iclasında  “İcbarı sığortalar  haqqında”   qanun  layihəsinə  edilən  dəyişikliklər də müzakirə olundu. Bildirildi ki, ötən il 2011-ci illə müqayisədə sığorta bazarında 60 faiz artım müşahidə olunub. İcbari sığorta bazarındakı artım könüllü sığortaya da təkan verir.
Sonda hər iki  sənədin Milli Məclisin plenar sessiyasının müzakirəsinə  çıxarılması  qərara  alındı. 

Milli Məclisin
Mətbuat  xidməti