Mayın 7-də Milli Məclisdə  Qadınlara  qarşı  zorakılıqla  mübarizə  haqqında Avropa Şurası Konvensiyasına həsr  edilmiş  seminar  və quruma  üzv  dövlətlərin parlamentariləri  üçün  hazırlanmış “Qorxudan uzaq, zorakılıqdan uzaq”  adlı kitabın  təqdimat  mərasimi  keçirildi.
Tədbiri  giriş  sözü  ilə açan Milli Məclisin deputatı, parlamentin AŞPA-dakı  daimi  nümayəndə heyətinin üzvü, qurumun Bərabərlik və qeyri-diskriminasiya komitəsinin Rasizm və ksenofobiya üzrə alt  komitəsinin sədri Sahibə  Qafarova Azərbaycanda insan  hüquq  və azadlıqlarının  müdafiəsi, xüsusən də qadınlara  qarşı zorakılıqla  mübarizə  sahəsində  görülən işlər  barədə danışdı. O,  AŞPA  katibliyi  tərəfindən  hazırlanan kitabın əhəmiyyətini  vurğuladı  və bildirdi ki, indiyədək 14  dilə  tərcümə  edilən bu praktik və nəzəri vəsait millət  vəkilləri  üçün çox dəyərli  olacaq. Sahibə  Qafarova  daha  sonra  Konvensiya  barədə  söhbət  açdı.  Bildirildi ki, 11 may  2011-ci ildə İstanbulda imzalanan  bu sənəd, bu vaxtadək 29 ölkədə imzaya  təqdim edilib, 4  ölkə  tərəfindən ratifikasiya  edilib.  İstanbul Konvensiyası  qadınlara  qarşı  zorakılığla  mübarizə,  zorakılıq  qurbanlarının  müdafiəsi,  onu  törədən  şəxslərin  məsuliyyətə  cəlb  edilməsi, bu sahədə siyasətin daha  da  dərindən formalaşdırılması kimi məsələləri  hərtərəfli olaraq  özündə ehtiva  edir.
Tədbirdə  iştirak edən Milli Məclis  Sədrinin müavini Bahar Muradova  bu  sənədin əhəmiyyətini  vurğuladı  və bildirdi ki,  qadın  hüquqlarının  müdafiəsi  və məişət zorakılığının qarşısının alınması cəmiyyətin mütərəqqiliyindən və sağlamlığından  xəbər  verir.  Azərbaycan  bu sahədə mühüm nailiyyətləri  ilə seçilən ölkələrdəndir. Vitse-spiker bu sahədə parlament  tərəfindən möhkəm hüquqi  bazanın  yaradıldığını  dedi, qəbul  edilən  qanunlar  barədə məlumat verdi. Bildirildi ki, hazırda  dövlətimiz  qadın  siyasəti məsələlərini uğurla  həyata  keçirməkdədir.
Sonra  tədbirdə AŞPA Bərabərlik və qeyri  diskriminasiya komitəsi sədrinin birinci müavini,  qadınlara  qarşı  zorakılıq  üzrə məruzəçi  Hose  Mendes Bota  çıxış etdi. O, qeyd  etdi ki, İstanbul Konvensiyası  qadınlara  qarşı  zorakılıq  üzrə məcburi  hüquqi  qüvvəyə malik olan ilk sənəddir və dünyada  istənilən  bir ölkənin  potensial olaraq  ona  qoşulması  üçün açıqdır. Sənəd  qadınlara  qarşı zorakılığın qanuna zidd olmasını, bunun cinayət  olduğunu  təsdiq  edir və bu sahədə  mübarizədə adekvat cəzalar tətbiq  etməyə  çağırır.  Bota İstanbul Konvensiyasının  mahiyyətini  aydın  şəkildə  əks  etdirmək  üçün bu gün Azərbaycan  dilinə tərcümə  edilmiş  kitabın da əhəmiyyətini vurğuladı.
Sonra seminarda Milli Məclisin Beynəlxalq münasibətlər və parlamentlərarası  əlaqələr komitəsinin sədri, parlamentin AŞPA-dakı daimi nümayəndə heyətinin rəhbəri Səməd  Seyidov, İnsan  hüquqları   komitəsinin sədri Rəbiyyət Aslanova,  millət  vəkili  Aytən Mustafayeva, ATƏT-in Bakı ofisinin rəhbəri Koray Tarqay,    QHT nümayəndələri, vətəndaş  cəmiyyətinin  üzvləri çıxış  edərək  fikirlərini  bildirdilər,  qadınlara  qarşı  zorakılıqla  mübarizə üsullarının  gücləndirilməsi ilə bağlı təkliflərini irəli  sürdülər.
Seminar Sahibə Qafarovanın yekun sözü  ilə başa  çatdırıldı.

Milli Məclisin
Mətbuat  xidməti