Mayın 1-də Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili Moldova Respublikası Parlamentinin İqtisadiyyat, büdcə və maliyyə komitəsinin sədri Radu Marian ilə görüşüb.

Səmimi söhbət şəraitində keçən görüşdə Azərbaycan-Moldova münasibətlərindən bəhs edilib, dövlət başçılarının və hökumət rəsmilərinin qarşılıqlı səfərləri zamanı imzalanan sənədlərin ölkələrimiz və xalqlarımız arasında əlaqələrin dərinləşməsi üçün əsaslı hüquqi baza yaratdığı qeyd olunub. Görüşdə parlamentlərimiz arasında əlaqələr də uğurla inkişaf edir və qanunvericilik sahəsində təcrübə mübadiləsinin önəmli olduğu, parlament nümayəndə heyətlərinin qarşılıqlı səfərlərinin, aparılan danışıqların, habelə deputatların parlamentlərarası qurumlarda və beynəlxalq təşkilatlarda əməkdaşlığının mühüm əhəmiyyət daşıdığı bildirilib.

Söhbət zamanı tərəfləri maraqlandıran digər məsələlər ətrafında fikir mübadiləsi aparılıb.

Görüşdə Milli Məclisin Moldova ilə parlamentlərarası əlaqələr üzrə işçi qrupunun rəhbəri Sabir Hacıyev, işçi qrupun üzvü Məşhur Məmmədov, Moldova parlamentinin Azərbaycanla dostluq qrupunun rəhbəri Vitali Jakot və digər rəsmi şəxslər iştirak ediblər.

Milli Məclisin Mətbuat və
ictimaiyyətlə əlaqələr şöbəsi