Mayın 31-də Milli Məclisin 2013-cü il yaz sessiyasının sonuncu iclası  keçirildi.
Milli Məclisin Sədri  Oqtay Əsədov  bildirdi ki,  bugünkü iclasın gündəliyinə 23 məsələ daxil edilib. İclasda əvvəlcə Fərhad Abdullayevin Azərbaycan Respublikası Konstitusiya Məhkəməsinin hakimi təyin edilməsi barədə məsələyə baxıldı. Səsvermə  keçirildi  və  Fərhad Abdullayev Konstitusiya Məhkəməsinin hakimi təyin edildi. O,  deputatlar qarşısında çıxış edərək ona göstərilən böyük etimada görə ölkə  başçısına və millət  vəkillərinə  minnətdarlığını ifadə etdi.  Fərhad Abdullayev  dedi ki,  yaxın vaxtlarda Konstitusiya Məhkəməsinin yaradılmasının 15 ili tamam olacaq. Ötən müddət ərzində Konstitusiya Məhkəməsi ölkəmizdə hüquq mədəniyyətinin inkişafına, qanunvericilik bazasının möhkəmləndirilməsinə, vətəndaşların əsas hüquq və azadlıqlarının müdafiəsinin yüksək səviyyədə təşkilinə xidmət edib. Ölkə iqtisadiyyatının inkişafı üçün möhkəm hüquqi bazanın yaradılması da diqqət mərkəzində olub. Fərhad Abdullayev millət  vəkillərini əmin etdi ki, Konstitusiya Məhkəməsi bundan sonra da dövlətçiliyin, vətəndaşların əsas hüquq və azadlıqlarının qorunması istiqamətində səylərini gücləndirəcək.  Fərhad Abdullayev Milli Məclis qarşısında təntənəli surətdə and içdi.
Sonra Milli Məclis “Azərbaycan Respublikasının 2012-ci il dövlət büdcəsinin icrası haqqında” qanun layihəsinin müzakirəsinə başladı.
İqtisadi siyasət komitəsinin sədri Ziyad Səmədzadə ötən ilin əsas maliyyə sənədinin icrası ilə bağlı bəzi məsələləri diqqətə çatdırdı.
İclasda  iştirak  edən maliyyə  naziri  Samir  Şərifov   sənəd  barədə bəzi məqamları ətraflı şərh etdi. Bildirildi ki, Azərbaycanın 2012-ci il dövlət büdcəsinin gəlirlər hissəsinin icrası  17 281 521,6 min manat, xərcləri  17 416 453 min manat, büdcə kəsiri  134,9 milyon manat, büdcə xəzinəsindəki qalıq  464 989,9 min manat həcmində təsdiq edilib.  2012-ci ildə ÜDM-in həcmi əvvəlki illə müqayisədə 2,2 faiz artaraq  54 milyard manat olub. ÜDM-in əhalinin hər nəfərinə düşən həcmi 5 884,5 manat təşkil edib. Onun sözlərinə görə, ötən il büdcə gəlirləri 17 281,5 milyon manat, xərcləri isə 17 416,5 milyon manat təşkil edib. Hesabat ilində Azərbaycanın valyuta ehtiyatları 14 faiz artaraq 46 milyard dollara çatıb, əhalinin gəlirləri isə 13,8 faiz artıb.
Nazir çıxışında onu da  vurğuladı ki, , 2012-ci ildə makroiqtisadi dayanıqlıq qorunub saxlanılıb, əhalinin gəlirləri artıb, qeyri-neft sektoruna, regionların inkişafına vəsait qoyuluşu davam edib, nəzərdə tutulan bütün proqramlar maliyyələşdirilib.  2012-ci ildə müdafiə xərclərinə 2,899 milyard manat,  elm, səhiyyə, mədəniyyət obyektlərinin tikintisinə 1,451 milyard manat vəsait  sərf olunub. Naxçıvanda investisiya xərclərinin maliyyələşdirilməsinə 130 milyon manat ayrılıb. Dövlət Neft Fondundan daxil olan vəsaitlərdən qaçqın və məcburi köçkünlərin mənzil şəraitinin yaxşılaşdırılması üçün 300 milyon manat xərclənib. Aqrar sektora diqqətin davam etdirildiyini vurğulayan nazir  bildirdi ki, bu məqsədlə dövlət büdcəsindən 112 milyon manat xərclənib.
Sonra   Hesablama Palatasının sədri Heydər  Əsədov  sənəd  barədə  fikirlərini bildirdi.
Müzakirələrdən sonra 2012-ci il dövlət büdcəsinin icrası ilə bağlı qanun layihəsi səsə qoyularaq yekdilliklə qəbul olundu.
İclasda Azərbaycanla Hindistan Respublikası arasında  cinayət  işləri üzrə qarşılıqlı hüquqi yardımı haqqında,  mülki və ticarət  işləri üzrə  hüquqi və məhkəmə yardımı haqqında, təslimetmə  haqqında  müqavilə sənədləri səsə  qoyularaq  təsdiq  edildi.
Gündəlikdə  duran  növbəti  qanun layihələri - “İcra haqqında”, “Əmək pensiyaları haqqında”, “Milli arxiv fondu haqqında”, “Sosial müavinətlər haqqında”, “Ölkədən getmək, ölkəyə gəlmək və pasportlar haqqında” qanunlara və Cinayət-Prosessual, İnzibati Xətalar Məcəllələrinə əlavə və dəyişikliklər edilməsi  barədə  sənədlər  haqqında  Hüquq  siyasəti  və  dövlət  quruculuğu komitəsinin sədri Əli Hüseynli məlumat verdi. Qeyd  olundu ki, qanun layihələrinə  edilən  dəyişikliklər Azərbaycanın  eks-prezidentləri və onların həyat yoldaşlarına bir sıra xüsusi imtiyazlar, o cümlədən xüsusi diplomatik status verilməsi ilə bağlıdır. Artıq   təqdim edilən   sənədlərə əsasən keçmiş prezident və onun həyat yoldaşına ayrılmış pensiya və sosial müavinətə qarşı mülki tələb yönəldilə bilməz. Yəni məhkəmələr onların pensiyalarına, onlar üçün ayrılan sosial müavinətlərə qarşı hər hansı borc tələbi, vurulan ziyanın ödənilməsi ilə bağlı tələb yönəldə bilməz. Onlara ömürlük diplomatik pasport veriləcək və xüsusi diplomatik statusa malik olacaqlar. Buna görə dövlət rüsumu  tutulmayacaq. Mədəniyyət komitəsinin sədri Nizami Cəfərov bildirdi ki, “Milli arxiv fondu haqqında” qanuna keçmiş prezidentin yazışmaları ilə bağlı sənədlərin onun öz sərəncamında saxlanılması haqqında müddəa əlavə edilir. Bu layihələrin də hər biri ayrı-ayrılıqda  səsə qoyularaq qəbul olundu.
Mülki Məcəlləyə, “Daşınmaz əmlakın  dövlət  reyestri haqqında”  və “Avtomobil  yolları haqqında” qanun layihələrinə  dəyişiklik  edilməsi barədə məlumat  verən Hüquq  siyasəti  və  dövlət  quruculuğu komitəsinin sədri Əli Hüseynli  hər  üç sənədə  edilən dəyişikliyin mahiyyətcə  eyni olduğunu bildirdi. Qeyd  edildi ki, bu  sənədlərə  edilən  dəyişiklik daşınar  və daşınmaz əmlakın, avtomobil yollarının  ünvan reyestrinə salınması ilə bağlı maddənin əlavə  edilməsini özündə əks  etdirir.   Millət  vəkilləri  hər  üç  sənədə  ayrı-ayrılıqda  münasibət  bildirərək qəbul etdilər.
Gündəlikdəki  digər iki məsələ -  Torpaq Məcəlləsi  və “Ərazi  quruluşu və inzibati ərazi  bölgüsü  haqqında”  qanuna dəyişiklik edilməsi  barədə  sənədlərlə əlaqədar Regional Məsələlər  komitəsinin sədri Arif  Rəhimzadə məlumat verdi. Hər iki sənəd  səsə  qoyularaq  qəbul  edildi.
Sonra Əli  Hüseynlinin təqdimatında Azərbaycan  Respublikasının  Mülki, Mülki-Prosessual, Cinayət-Presessual və İnzibati Xətalar Məcəllələrinə  dəyişikliklər edilməsi ilə bağlı  sənədlər səs  çoxluğu  ilə qəbul  edildi.
Cəlilabad rayonunun inzibati ərazi bölgüsündə qismən  dəyişikliklər  edilməsi  barədə qanun layihəsinin müzakirəsi zamanı bildirildi ki,  rayonun ötən əsrin  70-ci illərində birləşdirilmiş bir  neçə  inzibati  ərazi  vahidi yenidən  ayrılaraq  Dövlət  reyestrinə  daxil edilir.  Qanun layihəsi yerli  idarəetmə  orqanlarının əhaliyə daha  da  yaxınlaşması, onların problemlərinin  operativ və keyfiyyətli  həllinə  nail olmağa  xidmət  edəcək.  Bu  sənəd  də  səsə  qoyularaq  qəbul olundu.
Milli Məclisin Sədri  Oqtay Əsədov 2013-cü il yaz  sessiyasını  bağlı elan etdi.  Spiker dedi ki, Milli Məclis  rəhbərliyinə 91 millət vəkilinin imzası ilə növbədənkənar  sessiyanın keçirilməsi  ilə bağlı müraciət  daxil olub. İyun ayında  parlamentin növbədənkənar sessiyası keçiriləcək.
Azərbaycan Respublikasının  dövlət himni səsləndirildi.
Bununla  da  2013-cü il yaz  sessiyasının sonuncu iclası öz  işini başa çatdırdı.

Milli Məclisin
Mətbuat  xidməti