İyunun 11-də Milli Məclisin AŞPA Sosial məsələlər, səhiyyə  və davamlı inkişaf  komitəsinin birgə təşkilatçılığı ilə  “Uşaqların rifahı – cəmiyyətin rifah göstəricisidir” mövzusunda beynəlxalq konfrans keçirildi. Tədbir Avropa Şurasının “Uşaqlara  qarşı cinsi  zorakılıqla  mübarizədə parlamentlərin birliyi: Hər beş uşaqdan biri” kampaniyası çərçivəsində  həyata  keçirilirdi.
Tədbiri  giriş  sözü  ilə açan  millət  vəkili, AŞPA-da “Uşaqlara qarşı zorakılığa yox deyək!” proqramının koordinatoru Sevinc Fətəliyeva bildirdi  ki, bu, uşaqlara qarşı zorakılıqla mübarizə proqramı çərçivəsində keçirilən 3-cü konfransdır. O, ölkəmizdə uşaqlara qarşı zorakılığın aradan qaldırılması istiqamətində görülən işlərdən  danışdı və qeyd  etdi ki,  uşaq zorakılığının yaranmasının əsas səbəbi ailələrin sosial vəziyyətidir. Maarifləndirmə işlərinin daha da genişləndirilməli olduğu diqqətə  çatdırıldı. 
Toplantıda iştirak edən Milli Məclis Sədrinin  müavini Bahar Muradova uşaq hüquqlarının müdafiəsi barədə  fikirlərini  açıqladı.  Vitse-spiker  bildirdi ki, uşaqlara  sərf  olunan  kapital gələcəyin təməli deməkdir və Azərbaycan dövləti bu məsələyə xüsusi əhəmiyyət verir. Uşaq əməyinin istismarı, uşaqlara qarşı zorakılıq halları ilə bağlı Azərbaycan bir sıra beynəlxalq konvensiyalara qoşulub, bu sahədə qanunvericilik bazasını xeyli təkmilləşdirib. Bahar Muradova onu da vurğuladı ki, Azərbaycan müharibəyə cəlb olunmuş bir ölkədir. Ermənistan-Azərbaycan Dağlıq Qarabağ münaqişəsi nəticəsində  ölkədə bir milyondan artıq insan qaçqın və məcburi köçkün  həyatı  yaşayır.  Təbii ki, bu problem uşaqların rifahına olduqca mənfi təsir göstərir. 
Sonra  tədbirdə  AŞPA-nın məruzəçisi Silvia Eloisa Bone Pero,  Moldova parlamentinin deputatı, AŞPA Sosial məsələlər, səhiyyə və davamlı inkişaf komitəsinin Xüsusi Alt Komitəsinin sədri Valeriu Qiletçi  çıxış etdilər. Cıxışlarda uşaqlara qarşı cinsi zorakılıqla mübarizədə parlamentlərin birliyi, “Hər beş uşaqdan biri” kampaniyasının gedişatı, AŞ üzvü olan ölkələrdə insan hüquqları sahəsində mövcud göstəricilər, uşaq  hüquqlarının qorunması, uşaqlara  qarşı cinsi zorakılıqda məlumatlılığın artırılması, hüquq standartlarının möhkəmləndirilməsi  məsələlərinə  toxunuldu.  
İclasda  çıxış edən  Milli Məclisin Sosial siyasət komitəsinin sədri Hadi Rəcəbli bildirdi ki, Azərbaycanda uşaqlara qarşı zorakılıq hallarının artmasında internetin, xüsusilə sosial şəbəkələrin mənfi rol oynadığını qeyd etdi: “Uşaqlar arasında internet resurslarından istifadəyə müəyyən qadağalar qoyulmalıdır”. Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva komitənin ailə və uşaqlara dəstək üçün yaradılmış regional mərkəzlərinin səmərəli fəaliyyətindən danışdı.
Sonra konfrans  çərçivəsində AŞPA-nın Xüsusi  Alt  Komitəsinin iclası, uşaqların  cinsi  zorakılıqdan  qorunmaları üçün effektiv tədbirlər,  kiber  mühitdə uşaqların  təhlükəsizliyi, uşaqlara  qarşı  zorakılıqla  mübarizədə  müxtəlif  ölkələrin təcrübəsi mövzularında sessiyalar keçirildi.
Milli Məclisin Hüquq siyasəti və dövlət quruculuğu komitəsinin sədri Əli Hüseynli də internetin yeniyetmələrin həyatına müdaxilə etməsi ilə bağlı məqamlara  toxundu. Onun sözlərinə görə, son vaxtlar ölkədə geniş zolaqlı internet istifadəçilərinin sayı artmaqdadır, Azərbaycanda uşaqların internet təhlükəsizliyi problemi get-gedə aktuallaşır. Komitə sədri  uşaqların təhlükəsizliyinə ciddi maneə olan bu problemin qarşısının alınması üçün vətəndaş cəmiyyəti, özəl sektor və beynəlxalq qurumların birliyinə ehtiyac olduğunu dilə gətirdi. O, Azərbaycanın kiber cinayətkarlığa qarşı Avropa Konvensiyasına qoşulduğunu xatırlatdı. Bildirildi ki, konkret olaraq Cinayət Məcəlləsinə “kiber cinayətlər” adlı fəsil əlavə olunub.
Konfransda AŞPA-nın üzvü, Polşa Seyminin deputatı Zbiqnev Qirjinski, “İnternet Watch Foundation” təşkilatının  mətbuat və ictimai məsələlər üzrə meneceri Kristof Klaesen, almaniyalı deputat Qalina Eyzberman, Milli Məclisin  Beynəlxalq  münasibətlər  və parlamentlərarası əlaqələr komitəsinin sədri Səməd Seyidov çıxış edərək tədbirin əhəmiyyətini  vurğuladılar,  kiber mühitdə uşaqların təhlükəsizliyi  ilə  əlaqədar  fikirlərini  bildirdilər. Çıxışlarda qeyd olundu ki, uşaqlara qarşı zorakılıq dünyada hər kəsi düşündürməli və narahat etməlidir. Konfransda qarşıda duran vəzifələr və həyata keçirilməli olan işlərdən geniş söhbət açıldı, müxtəlif təkliflər səsləndirildi.
Toplantı Sevinc Fətəliyevanın yekun sözü ilə öz işini başa  çatdırdı.      

Milli Məclisin
Mətbuat  xidməti