Sentyabrın 12-də Milli Məclisdə  “Şərq  nağılı” - əlil gənclərin  birinci Beynəlxalq  Yaradıcılıq Festivalı  çərçivəsində görüş  keçirildi.
 Tədbiri  açan Milli Məclisin Sosial  siyasət  komitəsinin sədri  Hadi  Rəcəbli bildirdi ki, bu gün fiziki  qüsurlu  insanların cəmiyyətə inteqrasiyasını  sürətləndirmək məqsədilə Azərbaycanda çox  işlər  görülür. Komitə sədri  ölkədə paralimpiya idman növlərinin geniş vüsət aldığını,  Sumqayıt şəhərində məxsusi olaraq  bu idman  növləri ilə  məşğul olmaq  üçün  geniş idman kompleksinin fəaliyyətə başladığını dedi.  O, Milli Məclis tərəfindən qəbul edilən bütün qanunlarda fiziki qüsurli  insanların  hüquqları ilə bağlı maddələrin  yer  aldığını  vurğuladı.  Qeyd olundu ki,  Bakı şəhərində yeni  tikilən bütün yeraltı keçidlərdə və metro stansiyalarında əlillər üçün keçidlər quraşdırılıb.  Komitə sədri  “Şərq nağılı” adlı bu festivala dünyanın 10 ölkəsindən 200 nümayəndənin qatıldığını bildirdi.  
Tədbirdə  çıxış edən  gənclər və idman nazirinin müavini İntiqam Babayev bildirdi  ki, hər il yay aylarında nazirlik tərəfindən əlillər üçün xüsusi düşərgələr təşkil edilir. Artıq 18 ildir ki, dünya paralimpiya çempionatlarında bizim  gənclər  də iştirak edir, müxtəlif yerlər tutur və Azərbaycan  bayrağını göylərə qaldırır, himnimizin  səsləndirilməsinə nail olurlar.
Dünya Əlillər Cəmiyyətinin icraçı direktoru  Necdet Öztürk BMT-in Əlillərin hüquqları haqqında Konvensiyasının 142 ölkə tərəfindən təsdiqləndiyini qeyd  etdi. Bildirildi ki, bu gün dünyada 1 milyard 180 milyon fiziki qüsurlu insan var. Əlillər bütün dünyada dövlətin, ali məktəblərin, sivil cəmiyyətlərin marağında olmalıdırlar. O, qeyri-hökumət  təşkilatlarının bu məsələdəki rolunu xüsusi vurğuladı. Necdət Öztürk  Azərbaycanda belə insanların cəmiyyətə tam olaraq adaptasiya  edə bilməsi üçün görülən işləri yüksək qiymətləndirdi, mövcud problemlərdən söhbət açdı.
Daha sonra toplantıda Milli Məclisin deputatı Fazil Mustafa, İnsan hüquqları üzrə müvəkkil Elmira Süleymanova, Moskva şəhər Dumasının sədr müavini Oleq Smolin, Gürcüstan Gənclər və idman nazirliyinin  nümayəndəsi Natalya Çargeşvili, QHT nümayəndələri çıxış edərək əlilliyi olan gənclərin sosial inteqrasiyası, cəmiyyətə tam adaptasiyasının təşviqi, fiziki qüsurlu insanların hüquqlarının qorunması ilə bağlı problemlər, əlil insanların fəaliyyəti üçün imkanların artırılması  barədə fikirlərini bildirdilər.

Milli Məclisin

Mətbuat  xidməti