Dekabrın  17-də  Spiker  Oqtay Əsədovun sədrliyi ilə  Milli Məclisin  növbəti plenar  iclası  keçirildi. Parlamentin  Sədri əvvəlcə deputatları  “Şahdəniz - 2” layihəsinin imzalanması münasibəti ilə  təbrik etdi.  O, bunu Azərbaycanın Ulu öndəri Heydər Əliyevin neft strategiyası nailiyyətlərinin davamı, Prezident  İlham Əliyevin həyata keçirdiyi məqsədyönlü siyasətinin uğurlu nəticəsi kimi dəyərləndirdi. Bildirildi ki, bu layihə Azərbaycan xalqının rifahına  xidmət  edəcək.
İclasda deputatlardan Əli Məsimli, Xanhüseyn Kazımlı, Fazil Mustafa, Qüdrət Həsənquliyev, Qənirə Paşayeva, Zahid  Oruc, Vahid Əhmədov, İqbal Ağazadə, Fəzail Ağamalı, Flora  Qasımova çıxış edərək cari məsələlərlə bağlı fikirlərini bildirdilər.
Sonra  gündəlikdəki məsələlərin müzakirəsinə  başlanıldı.
Milli Məclisin Sədri  Oqtay Əsədov gündəlikdəki ilk məsələ -“Azərbaycan Respublikası Milli Məclisinin  parlamentlərarası əlaqələr  üzrə işçi  qruplarının  rəhbərlərinin  seçilməsi  haqqında” parlament qərarına dəyişikliklər  və əlavə edilməsi  haqqında  məlumat verdi.  Deputatlar  səsvermə yolu ilə sənədə edilən dəyişiklikləri  qəbul etdilər.
“Azərbaycan Respublikası Milli Məclisi deputatının  statusu  haqqında”  sənədə  dəyişikliklər  edilməsi barədə məsələ ilə əlaqədar  Hüquq  siyasəti  və  dövlət  quruculuğu komitəsinin sədri  Əli Hüseynli məlumat verdi. Bildirildi ki, qanun layihəsi  millət  vəkillərinin səlahiyyət  və vəzifələrini  müəyyən edir, eyni zamanda  deputat fəaliyyətinin həyata  keçirilməsi  üçün  hüquqi və sosial müavinətlər  nəzərdə  tutur.  Təqdim olunan layihəyə əsasən Milli Məclis  rəhbərliyinin və millət  vəkillərinin  vəzifə maaşlarının artırılması nəzərdə  tutulub.  Qeyd  olundu ki, Milli Məclis  Sədrinin  vəzifə maaşı 1950 manatdan  2250 manata qədər  artırılır. Sədrin birinci müavini, sədr müavinləri, komitə sədrləri, komitə sədri müavinləri və millət vəkillərinin vəzifə  maaşları  müvafiq olaraq parlament  sədrinin maaşının 90, 85, 80, 75 və 70 faizi məbləğində  nəzərdə  tutulur. Əli Hüseynli vəzifə maaşlarındakı vergi tutulmaları ilə bağlı da ətraflı məlumat verdi.  Sənəd  müzakirə  edilərək qəbul  edildi.
İclasda “Ticarətin maliyyələşdirilməsi üzrə Beynəlxalq İslam Korporasiyasının Təsis  Sazişinin təsdiq  edilməsi  barədə”  qanun  layihəsi haqqında İqtisadi siyasət komitəsinin sədri Ziyad Səmədzadə məlumat verdi. Qeyd olundu ki, Azərbaycanın iqtisadi maraqlarına cavab verən sənəd ölkəmizin islam dünyası ilə əlaqələrinin genişlənməsinə xidmət edəcək. Bildirildi ki, 36 islam dövlətini əhatə edən bu korporasiyanın yaradılmasında  əsas məqsəd  İslam Konfransı Təşkilatına üzv olan ölkələrdə ticarətin maliyyələşdirilməsi  və stimullaşdırılmasına  yönəlib.  Sənəd  səsə qoyularaq  qəbul  edildi.
Sonra “Azərbaycan  Respublikası Hökuməti  və Koreya  Respublikası  hökuməti arasında  sürücülük  vəsiqələrinin  qarşılıqlı  tanınması və dəyişdirilməsi haqqında” Sazişin təsdiq  edilməsi barədə sənədlə əlaqədar Hüquq  siyasəti  və  dövlət  quruculuğu komitəsinin sədri  Əli Hüseynli məlumat verdi və sənəd  səsə qoyularaq  qəbul  edildi.
Sonra iclasda “Dövlət  rüsumu  haqqında” və “Daşınmaz əmlakın dövlət reyestri haqqında” qanunlarda dəyişikliklər edilməsi barədə məsələlərə baxıldı. Hər iki sənədlə əlaqədar məlumat verən Ziyad Səmədzadə bildirdi ki,  ölkəmizdə “ASAN xidmət”in fəaliyyəti ilə əlaqədar bu qanunların bəzi maddələrində redaktə xarakterli  dəyişikliklərə zərurət yaranıb.  Dəyişikliklər  səsə  qoyularaq  qəbul edildi.
Gündəlikdəki növbəti “Məhkəmə və hüquq mühafizə orqanları işçilərinin  dövlət  icbari  şəxsi sığortası haqqında” qanuna  dəyişikliklər  edilməsi  barədə sənədi  də Ziyad  Səmədzadə  şərh etdi.  Bildirildi ki, qanunun 6-cı maddəsinə edilən əlavəyə görə, bu sahədə çalışanların dövlət icbari şəxsi sığortası üzrə işlərin aparılması xərclərinə ayırmalar müvafiq sığorta haqqlarının 10 faizi miqdarında müəyyən edilir. Sənəd  səs  çoxluğu ilə qəbul edildi.
Sonra Ziyad  Səmədzadə “İstehsalatda bədbəxt hadisələr və peşə  xəstəlikləri  nəticəsində peşə əmək qabiliyyətinin  itirilməsi  hallarından  icbari  sığorta  haqqında”  qanuna  edilən  redaktə  xarakterli  dəyişikliklərlə bağlı   fikirlərini dedi.  Sənəd  səsvermə yolu ilə  nəzərə alındı.
Sonra Hüquq siyasəti və dövlət  quruculuğu komitəsinin sədri  Əli Hüseynli  gündəlikdəki növbəti  4  məsələ ilə əlaqədar  ardıcıl olaraq  fikirlərini  bildirdi.  “Hüquqi  şəxslərin dövlət  qeydiyyatı və  dövlət  reyestri haqqında” sənəd  “Normativ  hüquqi  aktlar  haqqında”  Konststitusiya  qanununa  uyğunlaşdırılıb.  “Qeyri-hökumət  təşkilatları (ictimai birliklər  və  fondlar)  haqqında”, İnzibati Xətalar Məcəlləsində  dəyişikliklər  edilməsi  haqqında və “Cinayət  yolu ilə əldə edilmiş  pul  vəsaitlərinin və ya  digər əmlakın leqallaşdırılmasına və terrorçuluğun maliyyələşdirilməsinə dair mübarizə haqqında” qanunlarda edilən  dəyişikliklər haqqında danışan  komitə  sədri  bildirdi ki,  bu  sənədlərdə  millət  vəkillərinin və  vətəndaş  cəmiyyəti üzvlərinin müraciətləri  nəzərə alınaraq bəzi  müddəalarda  mövcud  olan nöqsanlar aradan  qaldırılıb.  Sənədlərdə edilən dəyişiklik və əlavələr  növbə ilə  səsə  qoyularaq  qəbul  edildi.
 “Qrant haqqında” qanunda edilən dəyişikliklərlə bağlı  İqtisadi siyasət komitəsinin sədri Ziyad Səmədzadə məlumat verdi. Qeyd olundu ki, yeni sənədə görə ölkəmizdə qrantların, sub-qrantın, qranta əlavənin qeydiyyatdan keçərək verilməsi, alınması və istifadəsi ilə bağlı hüquqi-iqtisadi münasibətlər tənzimlənəcək. Sənədin Azərbaycan üçün çox əhəmiyyətli olduğu, ölkəmizdə iqtisadi şəffaflığın artırılması baxımından vacibliyi  vurğulandı. Sənəd  səsvermə yolu  qəbul  edildi.
Daha sonra “15 yaşı tamam olmamış Azərbaycan Respublikası  vətəndaşının fərdi identifikasiya  kartı haqqında”  qanun layihəsi ikinci  oxunuşda  müzakirə  edildi.  Sənədlə bağlı məlumat verən  Hüquq  siyasəti  və  dövlət  quruculuğu komitəsinin  üzvü  Çingiz  Qənizadə  bildirdi ki,  8  maddədən ibarət  olan yeni qanun 15 yaşı tamam olmamış Azərbaycan vətəndaşına fərdi identifikasiya kartının verilməsi, dəyişdirilməsi, müvəqqəti alınması, təhvil verilməsi və qüvvədən düşmüş hesab edilməsi ilə bağlı yaranan münasibətləri tənzimləyəcək. Millət  vəkili  sənədin mükəmməl  və  dolğun  hazırlandığını,  qanun  layihəsinin Milli Məclisdə  birinci oxunuşda  müzakirəsindən  sonra  qeyd  edilən  təklif  və  rəylərin tamlığı ilə əksini tapmasını  diqqətə  çatdırdı. Qanun layihəsi  müzakirə  edildi,  maddə-maddə səsə qoyularaq qəbul edildi.
Bununla  da Milli  Məclisin bugünkü  iclası öz  işini başa  çatdırdı.

Milli Məclisin
Mətbuat  xidməti