Yanvarın 29-da  Milli Məclisin  Aqrar  siyasət  komitəsinin  2014-cü  ildə ilk iclası  keçirildi. İclası  açan komitə  sədri Eldar İbrahimov  yeni sessiyanın başlanması münasibəti ilə komitə  üzvlərini  təbrik etdi və 2013-cü ilin payız sessiyasında görülən işlər barəsində məlumat verdi. Bildirildi ki, ötən sessiya  dövründə komitənin 4 iclası keçirilib, 11 məsələyə, o cümlədən, 9 qanun layihəsinə baxılıb. Komitənin təqdim etdiyi 7 qanun layihəsi Milli Məclisdə qəbul olunub. Hesabat dövründə komitəyə vətəndaşlardan daxil olan 67 müraciətə baxılıb. Qeyd  edildi ki, komitə üzvləri  xarici ölkələrə  səfərlər  edib, beynəlxalq qurumların tədbirlərində fəal iştirak ediblər. Müzakirələrdən sonra payız sessiyasında görülən işlər qənaətbəxş hesab olundu.
Eldar  İbrahimov qarşıdakı sessiya müddətində  görüləcək işlərdən danışdı. Bildirildi ki, sessiya dövründə  komitədə yeni hazırlanan “Yaşıllıqların mühafizəsi haqqında” və “Kənd təsərrüfatının kooperasiyası haqqında” qanun layihələri Milli Məclisə təqdim ediləcək. Komitə sədri qeyd  etdi ki, sessiya  ərzində yeni qanun layihələri ilə yanaşı bəzi hüquqi sənədlərə də əlavə və dəyişikliklər olunacaq. Komitənin 2014-cü ilin yaz sessiyasının  qanunvericlik  işləri planı təsdiqləndi. 
Sonra Milli Məclis Aparatının İqtisadi  siyasət  şöbəsinin  müdir  müavini, Aqrar qanunvericlik sektorunun müdiri Şahmərdan Kərimov “Azərbaycan Hökuməti ilə Ukrayna Nazirlər Kabineti arasında bitki karantini sahəsində əməkdaşlıq haqqında” Sazişi təqdim etdi. Qeyd olundu ki, ötən ilin noyabr  ayında  Kiyevdə imzalanan saziş karantin nəzarətində olan materialların qarşılıqlı idxalı, ixracı və tranziti zamanı bitki məhsullarına zərər verən orqanizmlərin ölkə ərazilərinə daxil olmasının qarşısını alacaq. Bunun üçün tərəflər karantin tətbiq edilən zərərli orqanizmlərin siyahılarını mübadilə edəcəklər. Bildirildi ki, sənəd 5 il müddətinə bağlanıb və bu müddətin bitməsinə ən azı 6 ay qalmış tərəflərdən biri digərinə Sazişin ləğvi barədə rəsmi bildiriş  vermədiyi halda onun qüvvəsi avtomatik olaraq növbəti 5 il müddətinə uzadılacaq.  Sonra  Azərbaycanın “Beynəlxalq Üzüm və Şərab Təşkilatını təsis edən Sazişə qoşulması haqqında” qanun layihəsinə də baxıldı. Sənəddə Beynəlxalq Üzüm və Şərab Təşkilatnın fəaliyyət istiqamətləri, məqsədi, idarəetmə məsələləri öz əksini tapır. 2001-ci ilin aprelində Parisdə imzalanan Sazişə ölkəmiz bəyanatla qoşulur. Bəyanatda qeyd olunur ki, Sazişin müddəaları Azərbaycan tərəfindən Ermənistana münasibətdə tətbiq edilməyəcək. Həmçinin, Azərbaycan Ermənistanın işğal altında saxladığı ərazilərdə Sazişin müddəalarının həyata keçirilməsinə həmin ərazilər işğaldan azad olunanadək və işğalın nəticələri tam aradan qaldırılanadək təminat vermək iqtidarında deyil.
İclasda “Torpaq bazarı haqqında” qanuna təklif olunan dəyişikliklər də müzakirə  edildi.
Sonda sənədlər  baxılması üçün Milli Məclisin plenar iclasına təqdim edildi.

Milli Məclisin
Mətbuat  xidməti