Martın 4-də Milli Məclisin Hüquq siyasəti və dövlət quruculuğu komitəsinin növbəti iclası keçirildi. Komitə sədri Əli Hüseynli  gündəlik barədə məlumat verərək bildirdi ki, bugünkü iclasda 5 məsələnin müzakirəsi planlaşdırılıb.
Əvvəlcə  komitə  üzvləri Cinayət  və Cinayət-Prosessual Məcəllələrin bir  neçə maddəsində dəyişiklikləri müzakirə etdilər. Qeyd  olundu ki,  hər iki sənədin müvafiq maddələrinə edilən dəyişikliklər terrorizm cəhdləri,   terrorçuluğa  açıq  çağırışlar, dini düşmənçilik  və ya dini ayinlərin icrası  adı altında  vətəndaşlığı olmayan şəxslərin məzhəbini  yaymaq, silahlı münaqişələrə cəlb etmək, aqressiv dini təriqətlərə qoşularaq silahlı qrup  yaratmaq  kimi  qanunsuz  halların qarşısını almaq  üçün nəzərdə tutulan müvafiq  maddələrin sərtləşdirilməsini özündə  ehtiva  edir.
 Çıxış edən deputatlar Rövşən Rzayev, Fəzail Ağamalı, Qüdrət  Həsənquliyev, Çingiz  Qənizadə, Rəfael Cəbrayılov dəyişikliklərin zəruri olduğunu vurğuladılar, sənədlərin   əhəmiyyətindən  danışdılar. 
İclasda həmçinin “Qeyri-dövlət mühafizə fəaliyyəti haqqında” və “Məhkəmə və hüquq mühafizə orqanları işçilərinin dövlət icbari şəxsi sığortası haqqında”  qanun  layihələrinə  texniki  xarakterli  dəyişikliklərə  baxıldı.
Sonra “Dövlət qulluqçularının icbari sığortası haqqında” qanunun ləğv edilməsi barədə sənəd müzakirə edildi. Bildirildi ki, Konstitusiyanın müvafiq   hissəsi rəhbər tutularaq, “İstehsalatda  bədbəxt  hadisələr  və peşə  xəstəlikləri  nəticəsində peşə əmək qabiliyyətinin itirilməsi hallarından icbari sığorta haqqında”  qanun nəzərə  alınır  və bununla əlaqədar  “Dövlət  qulluqçularının  icbarı  sığortası  haqqında”  qanun ləğv  edilir.
Sonda qanun layihələri  baxılmaq  üçün Milli Məclisin plenar iclasına  tövsiyə  edildi.

Milli Məclisin
Mətbuat xidməti