MƏDƏNİYYƏT KOMİTƏSİNİN İCLASINDA
Sentyabrın 24-də Milli Məclisin Mədəniyyət komitəsinin 2014-cü ilin payız sessiyasında ilk iclası keçirildi. İclası açan Nizami Cəfərov əvvəlcə cari ilin yaz sessiyası ərzində rəhbərlik etdiyi komitədə görülən işlərdən danışdı. Qeyd olundu ki, bu dövrdə komitədə bir sıra qanun layihələrinə əlavə və dəyişikliklər olunub, “Nəşriyyat işi” və “Kitabxanalar haqqında” qanun layihələri yenidən işlənərək Milli Məclisin müzakirəsinə təqdim edilib.
İclasda payız sessiyasında komitədə baxılacaq qanun layihələri şərh olundu. Komitə sədri bildirdi ki, payız sessiyasının iş planına qanunvericilik təşəbbüsü subyektləri tərəfindən daxil olan sənədlər və Dövlət büdcəsi zərfinə daxil olan qanun layihələri ilə yanaşı, “Azərbaycan muğam sənətinin qorunması və inkişaf etdirilməsi haqqında”, “Kulinariya mədəniyyəti haqqında”, “Aşıq sənətinin qorunması və inkişaf etdirilməsi haqqında” sənədlər daxil edilib.
Sonra komitə üzvləri “Kinematoqrafiya haqqında” qanuna dəyişikliklər edilməsi barədə qanun layihəsi barədə fikir mübadiləsi apardılar. İclasda iştirak edən Mədəniyyət nazirinin müavini Ədalət Vəliyev sənəd barədə ətraflı danışdı. Qeyd olundu ki, mədəniyyətin mühüm bir sahəsini təşkil edən kino sənəti son illər ölkədə xeyli inkişaf etdirilib. Bununla bağlı ayrıca dövlət proqramı qəbul edilib. Hazırda kino çəkilişi, düşündürücü ssenarilərin hazırlanması ilə bağlı geniş layihələr hazırlanır. Kinematoqrafiya ilə bağlı olan mövcud qanun isə müasir stardartlara cavab vermir. Ölkədə keyfiyyətli kino qurğuları və lentlər hazırlanmır. Bu aparat və texnoloji kino avadanlıqları olduqca baha qiymətə xaricdən gətirilir. Buna görə də kino işi ilə bağlı materiallar ölkəyə idxal edilərkən vergi və gömrük rüsumundan azad edilməlidir. Nazir müavini bu maddənin sənəddə əksini tapmasının zəruriliyini qeyd etdi.
Millət vəkilləri Rafael Hüseynov, Jalə Əliyeva, Sahibə Qafarova, Leyla Abdullayeva sənədlə bağlı öz fikirlərini bildirdilər. Qanun layihəsi komitənin payız sessiyasının qanunvericilik işləri planına daxil edildi.
Milli Məclisin
Mətbuat xidməti